Hargaysa (HWN) Xog-hayaha Ganacsiga, Warshadaha & Dalxiiska ee Xisbiga WADDANI Xamse C. Khayre ayaa sheegay in uu kor ukacay qiimaha lagu iibiyo biyaga sifaysan ee cagadaha suuqyada Somaliland.

Xoghayaha ayaa dhinaca kale sheegay in aan lahayn meel uu jaan iyo cidhib dhigay wasiirka ganacsiga Somaliland, tan iyo markii uu Suuqa Waaheen gubtay.

Xoghayaha ayaa sidaasi ku sheegay qoraal uu baahiyay oo uqornaa sidan:-

"Qiimaha Biyaha Sifaysan Oo Kordhay

Qiimaha biyaha la sifeeyo ayaa si is og u kordhay caawa kadib shir la sheegay in yeesheen warshadaha soo saara biyahu.

Korodhkan ayaa yimi xili litirka shidaalka ahi u marayo 9,600 SoLSH.

Caagadda 750 ml ah  oo ahayd 2,500 SoLSH ayaa hadda  laga dhigay 3,000 SoLSH taas oo ah korodh dhan 20%. Dhanka kale caagadda 1 liter ah ayaa iyadana lagu daray 1000 SoLSH taas oo korodhay 25%.

In ganacsatadu ku heshiiso inay dadka qiimaha ku kordhiso waa sharci-darro, kaalintii xukuumadeed oo maqan waxaanay ka hor imanaysaa mabda'a suuqa xorta ah.

Waxaa loo baahan yahay samaynta xeerarka iyo siyaasadda tartanka iyo ilaalinta Dadka (Competition and Consumer Protection Policy). Xisbiga Waddani waxaa ka go'an in la xaqiijiyo  tartan xalaal ah,  kobcinta iyo dhiirigelinta Ganacsatadda iyaddoo dadkana laga ilaalinayo in loo heshiiyo.

Wasiirkii Ganacsiga, Warshadaha iyo Dalxiiska ayaan la hayn tan iyo intii  dalka ay ka dhaceen masiibooyinka sicir-bararka iyo dabka leh. Waxaanu xukuumada ugu baaqaynaynaa in aanay indhaha ka qarsan culaysyadda soo waajahay ganacsatadeena iyo culayska lagu ciirayo dadka masaakiinta ah ee awalba la il darnaa korodhka ascaarta”

Xamse C. Khayre

Xog-hayaha Ganacsiga, Warshadaha & Dalxiiska

Xisbiga WADDANI- Rejadda Shacabka.