Maxaa Dan Ah Ee Madaxweyne Biixi Ugu Jirta Kala Qaybinta Shacabka Somaliland ?
Afartii Sano ee lasoo dhaafay waxa ay Jamhuuriyadda Somaliland wajahaysay kala qaybsanaan hor leh oo ka dhalatey hab maamulka Madaxweyne Biixi iyo hadalo golo ka fuul ahaa oo Madaxweynuhu ka yidhi fagaareyaal kala duwan.
Haddaba isweydiintu waxay tahay maxaa faa'iido ah ee Madaxweynaha ugu jirta kala hadaladan aanu ka fiirsan ee uu fagaareyaasha ka jeediyo ?
Dadka aadka u yaqaan habdhaqanka siyaasadeed ee Madaxweyne Biixi waxay
sheegaan in Sooyaalkii taariikh siyaasadeed ee Madaxweynuhu u badnayd
Siyaasadda qaybinta iyo ku jiqsiintu. Halka ay aadka ugu yarayd siyaasadda
Midaynta Bulshada iyo Xallinta Khilaafaadku !
Marka aad dib u eegto hab maamulka Madaxweynaha ee 4tii Sanno ee lasoo
dhaafey, waxa kuu soo baxaysa in Madaxweynuhu aad ugu baahnaa hab-dhaqanka
siyaasadeed ee midaynta, isku ururinta iyo xallinta khilaafyada siyaasadeed ee
ay intooda badan sababeen hadalo aan laga fiirsan oo uu Madaxweynuhu ka yidhi
fagaareyaal kuba habboonayn.
"Siyaasiga Xariifka ku ah siyaasadda qaybinta Bulshadu, waxa uu ku fashilmaa siyaasadda midaynta iyo hoggaaminta Shacabka !
Wakhtigan oo uu Madaxweynuhu isu diyaarinayo safar uu ku tago Maraykanka
wuxuu baahi badan u qabay inuu gudo iyo dibad ba Shacabka reer Somaliland tuso
siyaasad Midnimo Qaran ah. Tani waxay si dadban iyo si toos ah ba wax uga
taraysay farriinta uu Madaxweynuhu u sido Adduunyada aynu aqoonsiga ka
raadinayo, iyo Shacabka reer Somaliland ee isu diyaariyay soo dhaweynta Madaxweynaha.
Nasiib darro, Madaxweynuhu wuxuu qaaday dariiqii looga bartey ee
Buuq-saraadnimada. Dalkii wuxuu kasoo baxay iyada oo muran siyaasadeed oo uu
dib u bilaabay ka jiro, Qurbihii na wuxuu ku soo waajahan yahay xilli uu
Shacabkii Jamhuuriyadda Somaliland hadalkiisan u dambeeyaa kala qaybiyay.
Ugu dambayntii, ma jirto Maalin ay Shacabka Jamhuuriyadda Somaliland uga
baahi badan yihiin Midnimo iyo Hoggaamiye jiho kali ah kaga saara Shacabka
duruufaha Abaareed, iyo kuwo Sicir barar haystaan.
Madaxweynaha oo wakhtigii la doortey ay Bilo kooban ka hadhsan yihiin waxa ku waajib ah inuu Ayaamaha u hadhay wax ka baddalo siyaasaddiisa gole ka fuulka ah, ku baddalo la tashi iyo ka fiirsasho, si dalka ay uga qabsoomaan Doorashooyinka Sinta isku wada hayaa !
W/Q Aqoonyahan Axmed Ismaaciil Cabdi
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!