Cabaadka Shiinaha iyo Hadal-haynta Warbaahinta Caalamiga ah ee Weftiga Soomaalilaan ee Taywaan.
Wasiirka arrimaha dibadda ee Shiinaha Wang Yi iyo afhayeenka wasaaradaasi Zhao, ayaa tiraba laba jeer ka hadlay siday uga xun yihiin weftiga Soomaalilaan ee tegay Taywaan. Labadan masuul way yar tahay inay ka hadlaan arrimaha ka dhacaya Afrika inta badan. Qaaciido ay adeegsadaan dublamaasiyiintu ayaa tidhaa” Inta suurtagal ah saaxiibo badan yeelo, laakiin cidna ha aaminin”. Mowduuca haddii aynu u soo noqono, warbaahinta caalamka kuwaa ugu afka dheer ayaa siyaabo kala duwan warbixino kala duwan uga qoray weftigii Soomaalilaan ee Taywaan tegay. Dhawr war qoraal ah oo ay bogagooda ku soo qoreen wakaalado warar oo ah kuwa ugu sumcada badan adduunku iyo wargayso ayeynu soo qaadan doonaa:
= Wakaalada wararka
ee reer Ingiriis ee Reuters oo kaalinta koowaad ama labaad kaga jirta
wakaaladaha adduunka ugu saameynta badan ayaa qoraal ay ku soo qortay bogeeda
hore ku soo qaadatay waraysi uu wasiirka arrimaha dibadda ee Soomaalilaan Dr.
Kayd Ciise ku sheegtay inay Soomaalilaan tidhi " waxaanu ku dhalanay xor” iyo
in dawladda Shiinuhu aanay waxba noo yeedhin Karin”. Wakaaladu waxa ay
warbixinteeda ku sheegtay in Soomaalilaan ay tahay meesha ugu nabadda badan oo
ay ka dhaceen doorashooyin Dimuquraadi ahi. Halka Soomaaliya ay muddo 30 sanno
ahi ay ka socdaa dagaallo sokeeye. Sidoo kale waxa ay warbixinteeda ku sheegtay
wakaaladu in xidhiidhka Soomaalilaan iyo Taywaan ee bilaabmay sannadkii 2020 uu
cadho ku kiciyey Bijiin iyo Muqdisho.
= Warbaahinta
France24 ayaa iyana sheegtay in Taywaan ay Shiinaha kula tartamayso saameynta
uu ku yeelanayo adduunka. Waxa ay
tusaale u soo qaadatay xidhiidhka dhexmaray Soomaalilaan iyo Taywaan iyo
weftiga Soomaalilaan ee Taywaan jooga. Waxa ay warbaahintu hoosta ka xariiqday
siday Soomaalilaan iyo Taywaan aanu adduunku u aqoonsan iyo siday Shiinaha iyo
Soomaaliya ugaga horreeyaan dhinaca doorashooyinka xorta ah.
= Warbaahinta South
China Morning Post ayaa cinwaan uga dhigtay qoraalkeeda ay Soomaalilaan kaga
hadlayso hadal taariikhda galay oo uu sheegay wasiirka arrimaha dibadda
Soomaalilaan oo ahaa " Annaga oo xor ah ayaanu dhalanay, si xor ah waanu u
noolaanaynaa, Shiinuhuna waxba nooma yeedhin karo”. Waxa ay warbixinteeda ku
sheegtay in Soomaalilaan ay tidhi ” Sidaanu doonayno ayaanu shaqadayada u
wadanaynaa”. Hadalkan ayey toos uga soo qaateen waraysi uu bixiyey wasiirka
arrimaha dibadda ee Soomaalilaan. Warbixinta waxa ay ku sheegeen in
Soomaalilaan ay jaar yihiin Jabuuti oo uu Shiinuhu ku leeyahay saldhiga Miltari
ee dalkiisa ka baxsan.
= Warbaahinta ABC
NEWS ayaa iyana sheegtay inay Soomaalilaan iyo Taywaan iska kaashanayaan
dhinacyada dhaqaalaha iyo siyaasadda, iyada oo aan adduunku aqoonsan. Wuxuu soo
qaatay kulankii dhexmaray weftiga Soomaalilaan iyo haweenayda madaxweynaha ka
ah Taywaan. Waxa ay soo qaateen sida labada dal ee Soomaalilaan iyo Taywaan ay
u sheegteen labada dawladood ee Shiinaha iyo Soomaaliya, iyana ay ugu doodaan
inay dalal madax bannaan yihiin. Taywaan ayaa 14 dal xidhiidh dulamaasiyadeed
la leh ayuu qoraalku sheegay.
= Warbaahinta CNA
ayaa bogooda hore ku soo qaadatay hadalkii wasiirka arrimaha dibadda ee
Soomaalilaan " Shiinuhu nooma yeedhin karo xidhiidhka aanu Taywaan la
leedahay”. Wuxuu bogga hore ku soo qaatay sawir muujinaaya wasiirka arrimaha
dibadda ee Soomaalilaan oo la fadhiga madaxweynaha Taywaan. Waxa kale oo ay
warbaahinta CNA soo qaadatay wasiirka Maaliyadda Soomaalilaan oo sheegay
suurtagalnimada inay Taywaan iska kaashanayaan dhinaca sahaminta Shidaalka
qaydhiin ee Soomaalilaan ku jira.
= Warbaahinta Taywaan ee Taipei Times ayaa bogeeda hore soo dhigtay sawir muujinaaya wasiirka arrimaha dibadda ee Soomaalilaan oo wasiirka arrimaha dibadda ee Taywaan Joseph Wu guddoonsiiya sawir muujinaaya khariirada Soomaalilaan. Warbaahintu waxa ay si faahfaahsan uga hadashay xidhiidhka mudada soo socday ee u dhexeeyey Taywaan iyo Soomaalilaan iyo inay iska kaashanayaan dhinacyada dhaqaalaha, beeraha, ganacsiga, waxbarashadda iyo siyaasadda.
Cali Cabdi Coomay
Suxufi, qoraa ah.
Hargaysa, Soomaalilaan,
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!