Xirsi Wuxuu Marayaa Imtixaanka u Leeyahay Guddoomiye Xisbi
Waxaa la sheegaa laba orodyahan oo is-daba ordaayay xadhigii dhammaadkana u dhaw in kii horeeyay jaleecay kii ka dambeeyay, hakadkaa yare ee xawaarihiisii ku yimid in lagu dhaafay oo kaalintii koowaad laga qaaday ee uu maanta oo dhan soo hogaaminaayay. Sidaasi oo kale noloshu tartan ma weydo. Marka la eego waaqaca gudaha siyaasadda Soomaalilaan, guddoomiye xisbi mucaarad wuxuu maraa imtixaano iyo caqabado siyaasadeed oo uu la kowsado marka xilka loo doorto. "Taariikhda marka dusha laga eegayo waa war uun, balse waxa ku hoos qarsoon xaqiiqooyin iyo cibro qaadasho." Ibnu Khalduun.
Dhawr qoddob ayeynu ka xusi doonaa imtixaankaa soo jireeka ah
= Madaxweyn Siillaanyo wakhtiyadii u ahaa guddoomiyaha xisbiga Kulmiye, waxa ugu cuslaa ee soo mara waxa ugu weynaa markii ay ciidanka boolisku rasaasta ku rideen isaga oo dhexsocda taageerayaashii oo maraya agagaarka Huteel Guleed. Wuu se iska sii watay ujaaddadiisii. Wuu se ka dabaashay.
= Labada masuul ee ugu sarreeya xisbiga Kulmiye, waa madaxweyne Biixi iyo wasiir Kaahin, Xirsi wuxuu qol kaga xidhay madaxtooyada intii u dhaxaysay 2010 ilaa 2015. Wuxuu u diiday inay fursad u helaan madaxweyne Siillaanyo oo ay duurka ku wada jireen 30 sanno. Way samreen oo ay ka dabaasheen.
= Madaxweyne Biixi markii uu ku dhawaaqay inuu musharrax
yahay, waa tii Xirsi ku qaaday weerar cir iyo dhul ah, aakhirkii waa kii
is-dhiibay ee yidhi aniga weeyi ka guuldarraystay ee ka noqday inuu tartan la
galo madaxweyne Siillaanyo.
= Dr. Gaboose, Maxamed Xaashi iyo Jamaal Caydiid waan kii
madaxweyne Riyaale jeelka u dhigay inay xisbi Qaran ku dhawaaqeen ee muddo
jeelka liinta ku dhex cabbayey.
= Guddoomiye Ciro waa tii cad hadh jeelka la dhigay
xoghayihiisii guud iyo afhayeenkii ee ay mudada jeelka ku jireen, wuxuu ahaa
imtixaankii uu soo maray.
Dhammaan caqabadaasi oo kuwa kale oo aynaan xusi ayaa
laga yaabaa inuu maro guddoomiye Xirsi inta uu xilka guddoomiyenimo hayo. Waxa
uu kaga gudbi karaa waa dul iyo dalis joogto ah. Waxa haatan u bilaabmay
guddoomiye Xirsi imtixaan siyaasadeed oo weyn oo u galay kuwii ugu
horreeyey. Waynu se dhawri doonaa siduu
uga dabaasho imtixaankaasi.
Cali Cabdi Coomay
Suxufi, qoraa ah.
Hargaysa, Soomaalilaan
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!