Maamulka Puntland ayaa baaq nabadeed u diray beelo dagaallo ku dhexmarayaan deegaannada Saax-maygaag iyo Sangejabiye oo ka kala tirsan goballada Nugaal iyo Sool.

Axmed Cilmi Cismaan Karaash madaxweyne ku xigeenka Puntland oo shir ja’raaid qabtay ayaa ugu baaqay beelaha dagaallamaya inay joojiyaan colaadda maadama ay yihiin dad ehel iyo xigto isku ah isla markaana ay wax badan ka dhaxeeyaan.

Sidoo kale madaxweyne ku xigeenka ayaa ugu baaqay odayaasha,culimad iyo waxgaradka beelaha dagaallamaya inay u kacaan sidii loo joojin lahaa dirirta.

Maamulka Puntland ayuu sheegay Axmed Cilmi Cismaan Karaash in intii karaankooda ah ay ku dadaali doonaan sidii nabad waarta loo dhex dhigi lahaa beelaha dagaallamaya.