Hubanti la’aan siyaasadeed ayaa weli ka taagan Suudaan in ka badan 24 saac kadib markii ay ciidamadu afgambiyeen dawladdii ku meel gaadhka ahayd ee dalkaas oo ay ku dhawaaqeen xaalad degdeg ah.

Tobanaan kun oo mudaaharaadayaal ah ayaa weli ku sii qulqulaya magaalada Khartoum, kuwaas oo dalbanaya in jeneraalada ay awoodda ku wareejiyaan rayidka.

Ilaa iyo hadda lama oga halka ay ku danbeeyeen Ra’iisul Wasaare Abdalla Hamdok iyo madaxdii kale ee rayidka ahayd ee ay xabsiga u taxaabeen ciidamada dowladdu.

Isagoo ka soo muuqday Euronews World, weriyaha Afrikanews Ronald Kato ayaa sheegay in jeneraalada ciidamada ay muddo dheer quudhsi ku hayeen xubnaha rayidka ah ee maamulka ku meel gaarka ah oo ay sugayaan kaliya waqti ku habboon si ay uga takhalusaan.

"Inqilaabku wuxuu dhacay maanta sababtoo ah shuruuduhu way ku wanaagsanaayeen…laakin mar walba waxay ahayd arrin waqti lala sugayo,” ayuu yiri Kato.