Janaraalka hogaamiya maamulka ku meelgaadhka ah ee talada Suudaan haya ayaa axaddii ballan qaaday inuu dib u habayn ku samaynayo ciidanka, maalmo kadib afgambigii dhicisoobay.

"Waxaan dib-u-habayn ku samayn doonnaa ciidamada qalabka sida … Hawlaha xisbigu waa ka mamnuuc ciidanka dhexdiisa,” ayuu madaxa golaha Suudaan xukumaa Jeneraal Abdel Fattah al-Burhan ka sheegay furitaanka isbitaal milatari oo ku yaal Khartuum.

"Ciidamada qalabka sida waxaa ka go’an inay qabtaan doorashooyinka taariikhda loo cayimay si la soo afjaro xilliga ku meelgaadhka” sannadka 2023, ayuu yiri.

Intaas ka dib, ciidanku wuxuu ka bixi doonaa masraxa siyaasadda kaalintooduna waxay ku koobnaan doontaa ilaalinta dalka.

Suudaan waxaa hoggaamiya maamul rayid ah iyo millatari sida ku cad heshiis awood-qeybsi ah oo la saxiixay bishii Ogosto 2019 ka dib markii madaxweyne Cumar Al-Bashiir ay milatarigu xukunka ka tuureen bishii Abriil ee sannadkaas ka dib mudaaharaadyo ballaadhan oo looga soo horjeeday xukunkiisa birta ahaa.

Dowladda Suudaan ayaa sheegtay inay fashiliyeen isku day afgambi 21-kii September oo ay ku lug lahaayeen saraakiil milateri iyo dad rayid ah oo lala xidhiidhiyey taliskii Bashiir ee xabsiga la dhigay. Ugu yaraan 11 sarkaal ayaa ka mid ahaa dadka la xidhay.

Ra’iisul wasaare Cabdalla Xamduuk ayaa tan iyo markaas ku baaqay in dib-u-habayn lagu sameeyo ciidanka dhexdiisa, waana arrin xasaasi ah oo ka jirta Suudaan.

Ku-meel-gaadhnimada xukunka rayidka oo aan dhammaystiran ayaa weli ah mid salfudud, oo ay weheliyaan kala-qaybsanaanta qotada dheer ee kooxaha siyaasadda, dhibaatooyinka dhaqaale iyo doorka dib-u-dhaca ku yimid hoggaamiyeyaasha rayidka.

Hoggaamiyaha awoodda iyo ku-xigeenka Burhaan ee Golaha Sare, Maxamed Xamdaan Daglo, ayaa eedda saaray siyaasiyiinta kadib afgambigii dhicisoobay.

"Siyaasiyiinta ayaa ah sababta ugu weyn ee ka dambeysa afgembiga maxaa yeelay waxay dayaceen muwaadinkii caadiga ahaa … waxayna aad uga dagaalamayaa sidii ay xukunka ugu sii jiri lahaayeen,” ayuu yiri Daglo.