Doorashadii Golaha Wakiilada Ka Dhacday Waxa Ay Ahayd Sharci Darro Waana In Lagu Celiyaa ...!!!
0
Wednesday August 04, 2021 - 10:17:05 in Articles by Hadhwanaag News
- Visits: 1877
-
- Share
W/Q: Mohamed Abdi Jama
( Waxa ayaan daro ah in golihii xeer dejinta uu kalfadhigiisii koowaad xeer jajab ku bilaabmay ).
Dalka jamhuuriyada Somaliland waxa uu leeyahay dastuur qaran oo
qeexaya sida uu u dhacayo kalfadhiga koowaad ee Golaha wakiilada
jamhuuriyada Somaliland waxaana si cad u sharaxaya Qodobka 44naad ee
dastuurka jamhuuriyada Somaliland oo odhanaya ;
1- Golaha cusubi waxa uu qabsanayaa fadhigiisa ugu horeeya ( 30 )
maalmood gudahood oo ka bilaabmaysa maalinta lagu dhawaaqo go'aanada
doorashada , waxaana isugu yeedhaya Madaxwaynaha jamhuuriyada
Somaliland.
2- Hadii madaxweynuhu isugu yeedhi waayo Golaha ayaa u kulmaya iskii
maalinta 45naad , laga bilaabo maalinta lagu dhawaaqo go'aamada doorasho
.
3- Golaha Cusub waxaa furaya gudoomiyaha maxkamada sare oo dhaarinaya
xubnaha , markaa waxaa gudoominaya shirka xubinta ugu da'da weyn ;
waxaana goluhu iska dhex dooranayaa gudoomiyaha iyo labada Gudoomiye ku
xigeen.
Haddaba halkani hadii uu noqdo xubinta ugu da'weyni murashax wax u
diidaya iyo sharci iyo xeer lagu duri karaa midina ma jiro , sababta oo
ah dooda dhinaca diidanaa Shirgudoonimada Faratoon waxa ay ku masaaleen
in uu goluhu sida maxkamada yahay, taasi oo aan waxba ka jirin oo
goluhuna aanu maxkamad iyo dacwada tusaalaha loo soo qaatay meelna ka
matelin hawshiisuna ay tahay hawl wadareed si wadajir ah loo qabto oo la
wada leeyahay shirgudoonkuna uu leeyahay ku dhawaaqista waxa loo soo
gudbiyo oo hab soo maray ( process).
Hadii xeer la waayey talaabada labaad waxa ay ahayd in loo noqdo
curfigii dalku ku soo shaqeeyey oo hadii lagu qanci waayey
shirgudoominta xubinta ugu da'da weyn oo murashax ah awgeed , waxa ay
ahayd talaabada labaad in uu shirgudoonka Golaha wakiilada noqdo inta la
dooranayo xubinta da' ahaan ku soo xigtaa.
Golihii iyada oo aan nidaamkii sharciga la marin ayaa waxa af-duubay
gudoomiyaha Guurtida oo la diyaar ahaa soo jeedin , waxaana uu yidhi
gudoomiyaha maxkamada sare ha gudoomiyo Golaha , arinkaasi gudoomiyaha
maxkamada sare wuu cadeeyey in aanay ahayn sharci oo waxa uu ina yidhi
aniga shaqadeydii waxa ay ku eekayd intii hore , isna waxa uu dalbaday
in gudoomiyaha Guurtida iyo Gudoomiyihii hore ee wakiiladu ay la
gudoomiyaan shirka .
MAXAA QALDAMAY ?
1- Waxa shirgudoonka Golaha wakiilada lagu duray masalo aan sharci jideyn oo xal ah iyo soo jeedin.
2- Waxa laga booday talaabadii labaad ee loo noqon lahaa hadii
sharciga iyo xeerarka dalka laga waayey qodob diidan shirgudoonka
xubinta ugu da'da weyn , waxaana ay ahayd in lagu laabto maxaa lagu soo
shaqeeyey oo curfi iyo dhaqan dalka u yaalay , lama yeelin.
3- Golaha waxa shirgudoomiyey Gudoomiyaha maxkamada sare ,
Gudoomiyaha Golaha Guurtida iyo Gudoomiyihii hore ee wakiilada oo aan la
garanayn sharciyada ay u adeegsadeen in ay kalfadhiga koowaad ee Golaha
gudoomiyaan.
SOO JEEDIN ;
Waxa ayaan daro iyo foolxumo weyn inagu noqon doonta oo dalkana
cidhib xumo u keeni doonta in golihii xeer-dejinta dalku ku bilaabmay oo
loogu wanqalay xeer jajab, soomaaliduna waxa ay ku maah-maahdaa hal
xaaraan ahi nirig xalaal ah ma dhasho e , waa in la yeelaa taladan si
qaranku u noqdo mid sharcigu sareeyo.
Maadaama aynu nahay dal dastuur iyo xeerar leh , Isla markaana u
sameystay in ay isku dhaqaan, waxa aan soo jeedinayaa in doorashada
Golaha wakiilada jamhuuriyada Somaliland ee shirgudoonka lagu celiyo si
loo waafajiyo dastuurka dalka, xeerarka ka farcama , Curfi iyo
caadooyinkii hore loo soo adeegsaday.
Mohamed Abdi Jama
Mohamed Dhimbiil
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!
Loading...
Loading...