Ila Qosol, C/llaahi Maxamed Cumar
0
Sunday August 01, 2021 - 10:51:10 in Articles by Hadhwanaag News
- Visits: 1564
-
- Share
" Dee mayee ma waalane waad soo dhaqaaqi weydey!
Qaybo ka mid ah dhulka Soomaalidu degto, waxa dhaqan ahaan ku adag;
in labada isqabtaa isugu yeedhaan magacyadooda! Halkii ay hebal iyo
heblaayo is odhan lahaayeenna, ay waxyaabo kale adeegsadaan. Sida:
Carruurtayda hooyadood, tan aannu wada joogno ama dabka ii shidda iyo
wixii la mid ah! Haweeneyduna ay tidhaahdo, carruurta aabbahood,
odaygayga, saygayga iyo wixii la mid ah.
Haddaba,
beri ayaa waxa is raacay; oday Maxamed la yidhaahdo iyo islaantiisii.
Iyaga oo wada socda, ayaa waxa ka soo horbaxay; niman ay odayga is
garanayeen. Markii ay cabbaar odayaashii is waraysteenna, waxa odaygii
Maxamed raagsatey; islaantiisii oo meel ragga ka durugsan ku sugeysey.
Dabadeedna,
islaantii oo ka khajilsan; inay odayga magaciisa ugu yeedho oo u
arkaysa ceeb, dhinaca kalana ka baqaysa in uu la diriro; ayaa dhawr jeer
tidhi, " Ee hooy hooy!" Markii uu soo jeedsan waayeyna, waxay u raacisay, " Ee Maxamadoow."
Odaygii ayaa maqlay, iyada oo magaciisii higgaadinaysa. Dabadeedna,
intuu cadho cirkaasi maray, ayuu raggii ku yidhi, " Nabagelyo." Wuxuna u
yimid islaantii oo meel halkeer ah ku sugeysey. Waxana uu islaantii ku
yidhi,
" Ee miyaad waalatay? Maxaa magacayga kuu geeyey?" Islaantiina waxay ugu jawaabtey, "
Dee mayee ma waalane waad soo dhaqaaqi weydey!"
Markii ay intaasi is dhaafsadeenna, inta uu hor dhaqaaqay isaga oo caydhaysan; ayuu ku yidhi, "
Ee dad waaweyn baynu nahaye, ayaynaan is Maxamedsanin!"
C/llaahi Maxamed Cumar
Email: [email protected]
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!
Loading...
Loading...