Hargaysa (HWN) Taliyaha Ciidanka Booliska Somaliland General Maxamed Aadan Saqadhi (Dabagale), ayaa sheegay in maandooriyaasha Khamriga iyo xashiishadu dalka dhibaato wayn ku hayaan.

Taliyaha ayaa sheegay in siyaabooyin kala duwan loo soo galiyo dalka, sida in ay dhacday in Istambiga gawaadhida lagu soo guro xashiishada iyo inay dhacday in Furaash lagu soo guray xashiishad, dabadeed qof bukaan laga dhigay la dul jiifiyay.

Taliyaha ayaa sidoo kale sheegay in tiraba dhawr jeer ay dhacday xashiishad lagu beeray beeraha duleedka magaalada iyo guryaha dhexdooda.

Taliyaha ayaa soo jeediyay in dhammaan hay'addaha dawladda iyo bulshadu ka hawl-galaan cidhibtirka Maan-dooriyayaasha, isagoo ugu dambayn soo jeediyay in hay'addaha dawladu kawada qayb-qaataan sida wasaaradda Diinta iyo Awqaafta, Warfaafinta, Caafimaadka, Waxbarashada oo uu sheegay in manhajka lagu daro dhibaatada ay leeyihiin Maan-dooriyayaashu.

Todobaadyadii ugu dambeeyay ayay ciidamada Booliska Somaliland ay soo bandhigeen maandooriye kala duwan oo gacantu ku soo dhigeen kuwaasi oo la doonayay in la soo geliyo Dalka.