Kumuu Ahaa Ardaygii Lagu Dhex Dilay Jaamacadda Camuud?
Waxaa lagu wadaa in maanta la aaso Ibraahim Cabdishakuur oo ahaa arday dhiganayay Jaamacadda Camuud ee magaalada Boorama, oo xalay uu askari ku dhex dilay gudaha jaamacadda.
Dhacdadan oo ay dakdu aad iskula dhex marayeen, ayaa la sheegay inay ka dambeysay kaddib markii ardaygaasi uu isku dayay inuu helo telefoonkiisa gacanta oo uu jaamacadda ku dhex ilaabay.
Mid ka mid ah askarta ilaalinayay ayaa u diiday inuu jaaacadda galo, kaddib muran dhex maray ayaa sababay in askariga uu rasaas ku furo ardaygaasi.
Sida
uu BBC-da u sheegay duqa magaalada Boorama Maxamed Axmed Warsame, toogashada
ayaa ka dhacday irridda hore ee laga galo jaamacadda oo uu ku sugnaa askariga
wax toogtay. Askariga oo ka tirsanaa booliiska Somaliland ayaa la sheegay in uu
hadda xiranyahay.
Maxaa lala xiriirnayaa dilka Ibraahim?
Waxaa baraha bulshada la isla dhex marayay in Ibraahim uu xirnaa dhar u midab eg kan calanka Soomaaliya, sidaasna ay sababtay in la dilo.
Balse
Diiriye Maxamuud Jaamac, oo ah madaxweyne ku xigeenka xiriirka bulshada ee
Jaamacadda Camuud, ee magaalada Boorama ayaa BBC-da u sheegay inaysan jirin
arrintaas. Wuxuuse sheegay inay jirto xiisad kale oo ku saabsan in ardayda
dugsiyasa sare ee magaalada Boorama qaarkood ay 26-kii June baraha bulshada soo
dhigeen arday ku lebisan calanka Soomaaliya, iyagoo ku sheegay inay yihiin kuwa
Jaamacadda Camuud. Wuxuu qirey in aysan wax xiriir ah ka dhaxaynin dilka
Ibraahim iyo arrinta calanka.
"Booliis badan ayaa magaalada la keenay, marka xiisadda calanka ayaa ka jirtay gudaha Jaamacadda," ayuu yiri.
"Siyaasad kale ma jirto aan ka ahayn inuu telefoon ku soo ilaabay jaamacadda, inuu xitaa Puntland ka soo jeedo cidna ma ogeyn, ee waan galayaa iyo ma galeysid unbaa la isku qabtay." Ayuu yiri Diiriye.
Sidoo
kale duqa magaalada Boorama ayaa beeniyay arrintaas, "Xaqiiqda meesha ka
jirtaa waa arday moobil ku soo ilaaway jaamacadda, wax calan ah iyo wax
hawshaasi quseeyana maba ahayn."
Kumuu ahaa Ibraahim Cabdishakuur?
Ibraahim Cabdishakuur oo ku jira da'da 20-aad wuxuu dhiganayay fasalka labaad ee kuliyadda injineeriyadda, ee Jaamacadda Camuud, isagoo baranayay cilmiga kheyraadka Biyaha.
Shalay ayuu galay imtixaanka looga gudbo fasalkaas, wuxuuna ahaa arday aad u dadaal badan, oo doonayay inuu noqdo injineer, marka uu jaamacadda dhammeeyo.
Cabdulqaadir Axmed Cabdi (Jeylaani) oo ay saaxiib dhow ahaayeen Ibraahim, isla markaana ah guddoomiyaha ardayda fasalka uu dhiganayay ardaygaas ayaa BBC-da u sheegay in Ibraahim uu ahaa arday aad u dadaal badan oo ka dhex muuqday ardayda kale ee fasalka.
"Wuxuu ahaa qof ka dhex muuqda ardayda, inta badanna jaamacadda ayuu joogi jiray. Wuxuu ku hammin jiray inuu wax ka qabto baahiyaha biyaha ee ka jira dalka, " ayuu yiri.
"Shalay
ayaan isla galnay imtixaanka, markii aan soo wada baxnay ayaan ku kala
leexannay guryaheenna. Mar dambe ayuu telefoonka walaalkiis iga soo wacay
wuuxuuna ii sheegay inuu telefoonka soo ilaabay, wuxuuna iga codsaday inaan
waco dean-ka fasalka, maqribbadii ayaa la ii sheegay inay xabbad ku dhacday oo
uu isbitaalka ku jiro,".
Caadi
ahaan marka imtixaamka la galayo, taleefoonada waa laga reebaa ardayda, waxaana
dhacday in Ibraahim markii uu imtixaamka kasoo baxay uu soo hilmaamay
taleefoonkiisa, taas oo keentay in uu ku laabto oo uu doonto mobeelka.
"Wuxuu ahaa qof aad u wanaagsan, bashaah ah, oo dad jecel dadkuna jecel yihiin aadna u furfuran." Ayuu yiri Jeylaani.
BBC-da
uma aysan suurtogalin in ay taleefoon ku hesho waalidka iyo qoyska Ibraahim
xilligii sheekadani diyaarinteeda lagu jiray.
Geerida
Ibraahim ayaa gilgishay quluubta Soomaalida, iyada oo dad ay baraha bulshada
soo wada dhigayeen sawiradiisa oo ay ka muuqato farxad badan iyo bashaashnimo.
Jaamacadda
Camuud waxa ay ka mid tahay jaamacadaha ugu muhiimsan ee ku yaala geyiga
Soomaalida, iyada oo arday badan oo Soomaali ah oo ka tagtay deegaanada
Soomaalida kala duwan ay u doontaan waxbarasho kala duwan oo tacliinta sare ah,
maamulka jaamacadana waxa ay shir jaraa'id ka sheegeen in ay ka tacsiyaynayaan,
kana xunyihiin wixii dhacay.
Guddoomiyaha jaamacadda Camuud Saleebaan Cabdi Guuleed ayaa odayaasha dhaqanka iyo culumu isugu yimid arrinta dilka dhacay u sheegay in waxa dhacay ay ahaayeen shil, kana xunyihiin ardayga ku baxay gacanta askariga
BBC