Muqdisho(HWN):-Dawlada federaalka ah ee Soomaaliya ayaa ka hadashay jawiga uu ku soo dhamaaday todobaadkii xoriyadu.

Wasiirka warfaafinta Soomaaliya Cismaan Abuubakar Dubbe ayaa qoraal uu soo saaray kaga hadlay jawiga ay ku soo dhamaadeen xusaskii la qabtay todobaadkii xoriyada Soomaalida, isaga oo si gaar ah uga waramay gabadh ku nool magaalada Boorama oo markii sadexaad xabsi loo galiyey calanka Soomaaliya oo ay ku labisatay.

Wasiir Dubbe ayaa qoraalka uu soo saaray u dhignaa sidan:-

Waxa inoo soo dhammaaday todobaadkii xoriyadda, maanta ayaana shaqooyinkii lagu soo laabtay, waxan rabaa in aan u mahad-celiyo guud ahaa Shacabka Soomaaliyeed oo muujiyey jacaylka waddankooda iyo calankooda. Sidoo kale waxa aan u mahad-celinayaa madaxda Qaranka oo ay ugu horreeyaan Madaxweynaha iyo Raisal Waaaaraha oo dhiirri gelin nala daba taagnaa mar kasta.

Waxan mahad gaar ah u celinayaa guddidii qaban-qaabada iyo guddi hoosaadyadii nagala shaqeeyey maalmaha xoriyadda oo aan la’aantood wax fiicani qabsoomeen.

Ugu dambayn waxan rabaa in aan halkan ku xuso laba qof oo mudan in la xuso:

Waa; Degan Miiraash iyo Maslax Maxamed Cabdi. Deggan Miiraash oo Reer Boorama ah markii 3aad ayay todobaadkan xabsi u gashay weynaynta calanka ummadda Soomaaliyeed aawadiis. Sidoo kale Maslax oo Reer Muqdisho ah wuxu naftiisa u hibeeyey in uu soo dejiyo Calanka oo si qalloocan loogu xidhay taalada Dhagaxtuur, 26kii June wuxu fuulay bir dhererkeedu yahay 30mitir oo leeg taalada Dhagaxtuur kaddib markii la waayey wiish soo dejiya. Waanu ku guuleystay.

Calankeenu wuxu summad u yahay 33ka malyuun ee Soomaaliyeed ee ku nool Geeskan Afrika. Mar kale hambalyo shacabkaygiiyow, ilaahay sanadkan sannadkiisa ha inagu gaadhsiiyo nabad, midnimo iyo barwaaqo.