Kharashka Doorashada Yaa Inagu Xukumay? Madax Adayg!
Bashiir Tarabbi Oogle,
Muddo ka badan sanad ay socotey wada hadalada axsaabta qaranka, waxaa
meel adag iska taagey xisbiga xukuummadda ee Kulmiye, iyada oo laga
waayey haba yaraatee wax tanaasul ah, arrintaas oo ka cadhaysiisay
qaadhaan bixiyayaasha, oo go'aan ku gaadhey in ay iyaguna ka ciddi
jiidaan deeqihii ay siin jireen Soomaalilaan, gaar ahaan kharashaadkii
doorashooyinka iyo dimuqraadiyadda.
Inkasta oo ay wakhti badan xukuumaddu ku lumisay arrimo gacmo daalis
ahaa, haddana ugu dambayntii, iyada oo aan is hubin, waxay qabatay
doorashooyin isku lamaan ( inkasta oo ay hindisihiisa lahayd xukuumaddii
Axmed Siilaanyo ) oo ka dhacda Soomaalilaan tii ugu wacnayd.
Dublamaasiyad xumida, isla weynida iyo ilbaxnimo yaraanta ay badiba ka
siman yihiin madaxda Soomaalida, ayaa ah waxyaabaha aadka loogu qawado
hoggaamiyayaasheena, waxaase aad isugu ekaa, marka ay doorashooyinka
timaado, madaxweynihii 3aad iyo kan 5aad ee Daahir Riyaale iyo Muuse
Biixi ( siday u kala horeeyaan ), waxaana loo aanayn karaa in ay
labadooduba ahaayeen saraakiil ciidan oo aan ku walaacin ka noqoshada
go'aanka maskaxdooda.
Dabeecaddaasi waxay labada hoggaamiye ee aan xaga sare ku soo sheegay,
wakhtigoodii Soomaalilaan dhaxalsiisay, hoos u dhac dhaqaale oo loo
sibir saaraynayo, safarradii iyo dalxiisayaashii oo yaraaday, awoodii
wax iibsi oo hoos u dhacdey, maal gashigii oo joogsadey iyo deeqihii
beesha caalamka oo la surmo seegteeyey.
Xukuumadda Kulmiye waa lagu ammaani karaa in ay doorasho loo riyaaqay
qabatay, wax aanay filaynin haba uga soo baxeene. Sababta doorashadu u
dhacdey, waxaa ammaanteeda leh xisbiyada mucaaradka oo odaynimo, asluub
iyo tanaasul badan muujiyey. Waxaase hubaal ah miisaaniyadda ku baxday
doorashada, haddii raggii maali yaqaaney joogaan, inay Soomaalilaan u
qaban lahayd mashaariic horu marineed.
Waxaa wanaagsanaan lahayd, sida dadku uga dagaalamaan dhaliil aanay lahayn , inay uga dagaalamaan guul aanay kasban.
Bashiir Tarabbi Oogle,
Burco, Soomaalilaan.
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!
Loading...
Loading...