Hargeysa(HWN):-Siyaasi Maxamuud Xaashi Cabdi ayaa musharixiintii dhacay ee doorashooyinkii golaha wakiilada iyo goleyaasha deegaanada la masaalay Muuse Biixi oo xisbigiisa lagaga guulaystay aqlabiyada golaha wakiilada.

Siyaasi Maxamuud Xaashi ayaa qoraal uu kula hadlayey musharixiintii dhacay waxa uu soo raaciyey sawir gudbiyey fariin ku socotay Muuse Biixi oo musharixiinta guuldaraystay kala siman in xisbigiisa guuldaro culusi ka soo gaadho doorashadii golaha wakiilada.

Fariinta uu siyaasi Maxamuud Xaashi u diray musharixiintii dhacday iyo sawirka dhambaalka dadban u siday Muuse Biixi ayaa u dhignaa sidan:-

Ninkii Sakaarada budhka la seegay, wuxuu yidhi ta danbaba.

Murashaxiintii aan ku guulaysan tartankii doorashada Wakiilada iyo golayaasha Degaanka waxaan leeyahay saaxiibayaal waad yar simbiririxateen, balse kamaydaan siiban salaanka iyo saaxadda siyaasadda. Dhicista siyaasadda waxaa laga dheefaa, casharo dhaxal gal ah, iyo barashada qaabab tiro badan, oo aan loo dhicin dharaaro kale.

Sidaa darteed, ha niyad jabina, hankiina ha tirina. Rag waa kii kufa ee hadana kaca. Bi'i waa e badhida boodhka ka tunta, isla markaana hal ku dhigiinu ha noqdo, sidii ninkii Sakaaradabudhka la seegay, ee yidhi ta danbe!! Hada ta danbeba yaanay ku dhaafin!!