Siyaasadu Ma Khiyaamaa?
W/Q: Sir Abdirashid Hussein Yousuf
Ramadan Kareem dhamaan asxaabta, ilaahay bisha barakaysan khayrkeeda hayna siiyo.aamiin
Suaal:
Horta Siyaasadu MA khiyaamaa?. Siyaasadu MA waxbay xumaysaa mise waxbay Hagaajisaa /qurxisaa?.
Waxaan arkay dhalinyaro badan oo siyaasada jecel inay galaaan, jecel
inay marwalba ka hadlaan, hadana aan fahamsanayn qaabkii ay bulshada
ula wadaagi lahaayeen arimaha LA xidhiidha siyaasada ee ayka hadlayaan,
ama si qaldan U fahamsan. (way jiraan dhalinyaro fahamsan si wacana
bulshada ugu soo gudbiya).
Sidaas daraadeed, waxan jeclaystay inaan qoraalkan yar ee kooban
idinla wadaago, kana jawaabo siday ila tahay ama fahamkayga shakhsiga
ah.
Siyaasad /Siyaasadda:
Erega Siyaasad luqo ahaan waa erey carabiya, markaad eegto habka loo
macneeyey luqad ahaan(Meaning) , dhamaan Macnayaasha Kala duwan naxwo
ahaan ee loo sameeyey, waxay kusoo ururayaan, laba eray. Macnaha waa
nuxurka kalmada carabi ahaan waa (siyaasadu waa Farid iyo Reebid).
Macnaha in dadka oo waxa wanaagsan LA faro, waxa xunna laga reebo. Si kale waa AMAR.
Markaad macnahaas qaadato waa kalmad asalkeedu yahay wanaag.
Dhanka kale markaas Eegno sida loo qeexay, ee Macnaha loogu
sameeyey shaqo ahaan (Definition/in terms of Functionality), ee aad
eegto dhamaan khubarada ku xeeldheer arimaha siyaasada iyo waxay ka
qoreen, nin Waliba dhanka uu ka galay, iyo sida uu u cabiray siyaasadu
waxa ay tahay, markaas soo khulaasayso iyo nuxurka xeeldheerayaashu
kusoo biyo shubanayaan, waxa kusoo baxaaya "Siyaasadu waa hab lagu
ilaaliyo nolosha bulshada, lagu dhaweeyo dhamaan arimaha mujtamaca, lagu
qurxiyo dowladnimadooda, wada jir kooda, hormarkooda, xuquuqdooda
Gudaha iyo debedaba, waa hab lagu wanaajiyo xidhiidhka ka dhexeeya
xukunka iyo LA xukumaha, waa hab lagu qaybiyo khayraadka umadu leedahay,
lagu ilaaliyo cadaalada".
Macnahan kooban waxa kasoo dhexbaxaysa Macnaha dowladnimada, waayo
waaba shaqadii dowladu qabanaysay /loo samaystay dowladnimada /loogu
baahday in dowladnimo LA samaysto. Sidaas daraadeed waxaynu odhan karnaa
macno kale oo kooban oo ah "Siyaasaddu waa kabbihii dowladnimadu
/dowladu ku soconaysay, ee qodxaanta, dhagaxa iyo dhaawacaba ka
ilaalinaysay dowladnimada iyo guud ahaan shacabka hoos jooga".
Islaamka /khubarada Islamku iyagu maxay qabaan, siyaasadu waa maxay?.
Fahamka islaamka ee siyaasada Waxaan iyana kusoo koobayaa "Siyaasadu
waa dhag an galinta kitaabka iyo sunaha NABIGEENA Mohamed Scw, bulshada
oo la dhiso aduunkeeda iyo aakhiradeedaba, wanaaga oo la faro, xumaanta
oo la reebo, masaalixda bulshada oo la ilaaliyo iwm). Macnahan waxa uu
ku biyo shubanayaa uun in bulshada nolosheeda LA ilaaliyo, lana kobciyo.
Sidaas daraadeed, muslimiinta iyo dadka aan muslimka ahayniba, waxay
isku Waafaqsanyihiin siyaasadu inay tahay wax wanaagsan oo lagu qurxiyo
nolosha, dowladnimada, lagu camiro aduunka.
Markaan isku soo gayno, suaalaha horena aynu ka jawaabno, waxa inoo soo baxaaya laba shay :
1. Siyaasadu waa wanaagsan,horumarka nolosha aduunka iyo ta
aakhiraba guusheedu waxay ku xidhan tahay waa siyaasad, kolba habka loo
maareeyo.
2. Siyaasadu waa cilmi, waa aqoon LA barto, waqti LA galiyo,
dhaqaale LA galiyo, maaha hadal iyo TV laga dhurmo, waxay leedahay hab
looga hadlo, qaaciidooyin LA raaco, faham, sifooyin lagu tilmaansado
iwm.
Sidaas daraadeed siyaasadu maaha Khiyaamo, maaha ficiltan, maaha
hadal iyo waan hadlayaa uun, maaha wax xun, waa wax wanaagsan, waxna
wanaajisa, qurxisa. Sidaas daraadeed siyaasada wanaagsan iyo siyaasiga
wanaagsan ee siyaasada sidaa waxba MA xumeeyo waxbuu wanaajiyaa.
Wuu ila dheeraatay LA soco qaybta labaad iyo halka dhalinteenu
markay bulshada LA hadlayaan, meesha ay kasoo galayaan, iyo waxa ay ka
hadlaan aan kusoo qaadan doono.
Aragtidiina waa soo dhaweynayaa.
Sir Abdirashid Hussein Yousuf
Doha, Qatar.
Afkana xidho badbaadi bulshadaada.
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!
Loading...
Loading...