Rooble oo Isbitaalka ku booqday Askartii ku dhaawacantay dagaalkii Shabeellaha Hoose
Ra’iisul Wasaaraha Xukuumadda Federaalka Soomaaliya ee xil-gaarsiinta Maxamed Xuseen Rooble ayaa Isbitaalka Xoogga booqday askarta CXD ee ku soo dhaawacantay weerarkii maalmo kahor Saldhiyada Awdheeglle iyo Bariire.
Ra’iisul Wasaare Rooble oo warbixin ku saabsan xaaladda dhaawacyda askarta ka dhageystay saraakiisha Isbitaalka, ayaa sidoo kale askarta dhaawaca ah ka wareystay xaaladdooda, una rajeeyay caafimaad deg deg ah.
Rooble ayaa askarta uga mahadceliyay difaaca dalka, waxaana uu u ballan qaaday in dowladda Federaalka Soomaaliya u heellan tahay daryeelkooda.
Qaar ka mid ah askarta u soo dhaawacantay difaaca Qaranka ayaa Ra’iisul Wasaaraha uga mahadceliyay booqashadiisa, iyagoo tilmaamay in ay diyaar u yihiin isla marka ay bogsoodaan in ay dib ugu laabtaan furimaha dagaalka.
Magaalada Muqdisho ayaa waxaa la keenay Askartii kusoo dhaawacantay weerarkii Saldhiyada Ciidamada ee Awdheeglle iyo Bariire ee Gobolka Shabeellaha Hoose, waxaaana weerarka ka dhashay khasaaro dhimasho iyo dhaawac ah, iyadoona Dowladda ay guulo ka sheegteen weerarka.