Godka Lagu Janee Geesibuu Ahaa!!!
Prof. Faarax Barre Shirre, EEBE wayne ayaan uga baryayaa inuu ugu deeqo naxariistiisa ballaadhan, qabrigiisana ka yeelo beer ka mid ah beeraha Janadda.
Faarax Barre, waxaanu xidhiidh
toos ah lahayn dhawr iyo labaatankii sano ee u dambeeyey. Faarax mar wuxuu ii
ahaa macalin, mar waxaanu ahayn saaxiibo shaqeed (work colleagues), iyadoo aanu
ka wada shaqayn jirnay Hay’adda wayn ee Candlelight, waliba aanu isku xafiis
ahayn, marna wuxuu ka mid ahaa shaqaale waynaha Jaamacadda Admas.
Faarax Barre, wuxuu ahaa macalin
waayo arag ah (bare sare), kaas oo aan xiisadihiisa lagu caajisin, lagana xiiso
dhicin. Wuxuu ahaa ruug caddaa waayo arag ah, wuxuuna ahaa geed adayg aan la
loodin. Wuxuu ahaa nin Ilaahay fahmo ku manaystay, ku dhex jiridda aqoontuna
balwad u ahayd.
Faarax wuxuu ahaa aqoonyahan,
wuxuu ahaa tabo-bare waayo arag ah, wuxuu ahaa dhaqan yaqaan, wuxuuna ahaa
gorfeeye siyaasadeed, wuxuu ahaa taariikh kaydiye, wuxuu ahaa nin furfuran oo
kaftama goorta iyo goobta ay ku haboon tahay.
Ustaad Faarax, in ka badan toban
sano oo uu macalin ka ahaa Jaamacadda Admas, wuxuu ahaa tusaale nool oo lagu
daydo, dhanka edaabta wanaagsan ee shaqada iyo dhanka akhlaaqiyaadkaba.
Ustaadka, waligii shaqo laguma canaanan, wakhti shaqeedna dib ugama dhicin, maado (course) lagu qorayna ma dhammayn waayin, wuxuuna mar walba ahaa qofka ugu horeeya ee imtixaanka soo gudbiya, qofka ugu horeeya ee natiijadda ardayda soo xareeya, waxaanu ka dedaal iyo tamarba badnaa ninkasta oo dhalinyaro ah.
Faarax Barre, waa tiir ka baxay
bahda aqoonyahan Somaliland, waxaanan tacsi u dirayaa ehelkii iyo qaraabadii uu
ka baxay, sidoo kalena waxaan ka tacsiyadaynayaa bah-waynta waxbarashada
Somaliland.
RABBI ha u naxariisto, qabrigana ha u nuuro!!!
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!