Garoowe(HWN):-Shirkii u dhaxeeyey dawlada federaalka ah ee soomaaliya iyo maamul goboleedyada ayaa haatan si rasmi ah uga furmay xarunta madaxtooyada maamulka Puntland.

Shirkan oo uu gudoominayo madaxweyne Farmaajo isla markaana ay qayb ka yihiin raysal wasaarihiisa iyo madaxda maamul goboleedyada ayaa lagu sheegay inuu yahay mid wada tashi ah oo ay yeelanayaan labada dhinac, iyada oo aan la cadayn in lagu soo qaadi doono khilaafkii u dhaxeeyey dawlada Muqdisho iyo maamul goboleedyada oo mudooyinkii ugu dambeeyeyna sii xoogaysanayey.

Madaxweynaha dawlada federaalka ah ee soomaaliya Maxamed Cabdilaahi Farmaajo oo furay shirkan ayaa ka jeedinaya khudbad uu kaga hadlayo muhiimada ay leedahay wada shaqayntu, isaga oo madaxda maamul goboleedyadana u soo jeedinaya in xidhiidhka ay la leeyihiin dawlada federaalka ahi uu yahay mid muhiim u ah soomaaliya iyo sidii hore loogu socon lahaa.

Shirkan ayaa mudada uu socdo la filayaa in lagu soo qaado arimo la xidhiidha doorashooyinka heer federaalka, xeerka dhawaan la ansixiyey ee doorashooyinka, amniga, dhaqaalaha iyo qodobo kale oo muhiim ah.