Maxkamadduhu Uma Dhisna Dhexdhexaadin, Waa se Gar-qaadis iyo Go'aan
Maahmaah
Carbeed ayaa tidhaa” Marka sababta la ogaado ayuu yaabku qarsoomaa”. Waa wax
lala yaabo in guddoomiyaha maxkamadda sare uu ku faano kiis uu dhexdhexaadin ka
galay, halkii uu kaga faani lahaa kiis ay ka gar-naqeen oo ay caddaalad iyo go’aan
xalaal ah ka soo saareen. Dhexdhexaadin waa dhaqanka suubban ee Soomaalida, oo
ay hore ugu soo dhaqmi jireen ka hor intii aanu nidaamka dawladnimo soo
gaadhin. Wax lagu micneeyo lama garanayo in dad gar-qaadistii maxkamadaha ka
quustay oo iskood u heshiiyey la isku sawiro iyada oo lagu soo daba-gabbanayo
waanu dhexdhexaadinay. Garta dhaqanka ee
maalinlaha ah ee ay ku foogan yihiin odayaasha reeraha u taliyaa waa shaqada ay
maalin kasta qabtaan. Markaa sow shaqadii odayaasha maxkamadu kumay qabsan? . Haddiiba
ay maxkamaduhu dhexdhexaadiintii dhaqankeenna ahayd ku faanayaan, maxaa ay soo
kordhisay aqoontii casriga ahayd ee maxkamaduhu?
=Xeerarka Garta Soomaalida: Soomaalidu waxay leedahay xeerar ay ku kala baxaan markay is-qabtaan. Sida dhaqan ahaan loo kala duwan yahay ayaa xeer ahaan loo kala duwanaanayaa. Xeerark dhaqanka waxa hogaamiye, Caaqilada, Suldaanka, Garaadka, Boqorka, Ugaaska iyo waliba odayaasha beelaha u taliya. Beelaha jaarka ah waxa ka dhexeeya xeerar ay ku wada dhaqmaan, oo ay ku kala baxaan markay wax isku qabtaan. Arrrimaha inta badan la isku qabto waxa ka mid ah: dilal, xoolo la kala qaado, dumar la faraxumeeyo IWM. Dhinaca kale waxa jira xeerar ka dhexeeya oo lagu dhaqmo, markay qabiilku amma jilib hoose is-qabtaan. Waxaana la odhanayaa” jilibkaasi maxaa xeer inooga yaallay markay arrintan oo kale dhacdo”. waxa aynu dul-istaagi doonaa labadan dhacdo:
=
22/1/2020 waxa ay maxkamadda sare go’aan dhexdhexdiin ah ka gashay guri la isku
haystay muddo ku dhow 50 sanno. Guddoomiyaha maxkamadda sare ayaa warbaahinta
xafiiskiisa kula hadlay iyada oo ay hareera fadhiyaan dhinacyada isku haystay
gurigu, waa nooc ka mid ah xayeyiis shaqo ku faanka. Wuxuu ku faanay inay ku
guulaystay inay kiiskaasi ku dhammeeyaan sulux, halkii ay ka ahayd inuu ku
faano inuu qaaday kiis ay dad isku haystaan oo dacwadiisa go’aan kala saaris ah
laga gaadhay. Dadku waxa ay maxkamadaha u yimaadaan in lagu kala saaro
qar-qaadis, uma se yimaadaan in la dhexdhexaadiyo, waayo dhexdhexaadin iyo
waxaasi ka tag taana liq oo gobonnimada ka raac waa dhaqankii soo jireenka ahaa
ee Soomaalidu weligeeba ay ku kala bixi jireen. Markii la waayey kiisas si
caddaalad ah loogu kala baxo ayey macaanaatay dhexdhexaadintii.
=
22/12/2020 waxa sidii caadada ahayd ay
maxkamadda sare soo saartay go’aan ay ku dhexdhexaadisay laba dhinaca oo dhul
isku haystay muddo ku dhow 20 sanno. Kiiskii dhexdhexaadin ku faankii ayaa
halkiisii ka sii socday, waxaanu guddoomiyaha maxkamadu la hadlay warbaahinta
oo u sheegay in dawcaddani dhulka la isku haystaa ay muddo dheer soo socotay oo
uu saartay guddi sulxu ku dhamaysa. Sida ka dhadhamaysa markay dhexdhexaadini
timaado waa marka ay dadku ka quustaa qar-qaadis caddaalada ku dhisan oo dadku
ku kala baxaan.
Cali Cabdi Coomay
Suxufi, qoraa ah.
Hargaysa, Soomaalilaan
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!