Somalia Amni Uma Keeni Karo Shisheeye, Ee Waa In Dadka Soomaaliyeed Dib Isugu Noqdaan !
W/Q: Mohamed Abdi Jama
Waxa wax lala yaabo iyo naxdin joogta ah noqotay in amniga dawlada
Somalia uu noqday ka aduunka ugu hooseeya, sida ay warbixinta la
yidhaahdo Global peace Index uu ku soo saaray machadka daraasadaha
dhaqaalaha iyo nabada IEP , sidaasi oo kale ayaa warbixinta la
yidhaahdo Global Terrorism Index na ay Somalia ka noqotay wadanka
shanaad ee aduunka ugu khatar badan xaga saameynta argagixisada.
Waa wax laga damqado oo dhibeysa qofkasta oo binu adem ah in bil
walba lagu laayo qaraxyo iyo is miidaamin dad shacab ah , masuuliyiin
dawladeed amaba la beegsado madax ajaanib ah , waxa ay ku tusaysaa
heerka binu adenimo iyo dadnimo laga taagan yahay waxa Somalia ka
socdaa.
Somalia waxa ku sugan ciidamo badan oo ku dhow 30,000 kun oo
ciidamada nabad ilaalinta iyo ciidamo kale oo badan isugu jira oo
Somalia u jooga dawlad dhis iyo dano siyaasadeed oo kala wada duwan,
waxaa lacag ku bixiya aduunka oo dhan oo waxaa gala boqolaal milyan oo
dollar, hadana in ay amni sugi kari laayihiin waxa ay noqoneysaa laba
mid uun ;-
1- In ciidamada Somalia ku sugani aanay ujeedkoodu aheyn nabad
ilaalin kaliya ee ay ku jirto in Somalia ahaato mashruuc waligii la
maalo oo aan dhamaan , isla markaana aan laga filan karin rajo qaar soo
wada.
2- In la garan laayahay cida lala dagaalamayo oo jaah wareer jiro,
oo ilaa maanta aan la sugin cadawga dadka ku laynaya Somalia , isla
markaana magaca la isticmaalo ee shabaab uu yahay waraabe u taag loo
sameystay saarista dambiga.
HADII LA KALA ADKAAN WAAYEY OO AJAANIB IYO SOMALIBA AMNIGA DADKA
MUQDISHO IYO SOOMAALIYEED LA SUGI KARI LAAYAHAY XAL KALE MALA RAADIN
KARAA ;
Waxa aan qabaa haa waa la heli karaa , oo waxa la yeeli karaa in lala
heshiiyo ururada argagixisada ee Somalia ka dagaalamaya , waxaana
sameyn karta dawlada Somalia oo caalamka tidhaahda na suga aanu wada
hadalnee oo waxii naga soo baxa ku go'aan qaata.
Hadii tani suuragal noqoto oo ay hirgasho waxa aan is leeyahay wax
badan oo kale ayaa meesha ka bixi doona oo maanta la laayahay dhinac loo
saaro iyo meel lagu tiiriyo toona , hadii laakiin la is iloobo dhibta
waa lala qabsadaa oo waxa dhacayaa waxa ay noqon doonaan wax aan lagaba
damqan.
DAGAALKA SOMALIA KA SOCDAA WAA IMISA NOOC , MA ALSHABAAB KALIYA AYAA SOMALIA KHATAR KU AH ?
Dagaalka Somalia ka socdaa wuu badan yahay Al-Shabaab ha noqdaan
cadawga ugu xun ee saldhiga u ah dhibaatooyinka hadana waxa jira dagaalo
kale oo dhaqaale, siyaasadeed iyo dano laga leeyahay dalka Somalia oo
dawlado shisheeye wadaan.
Waxa jira dadka soomaaliyeed in la kala yeeshay oo cidiba dal iyo
dawlado kale aragtidooda iyo afkaarahooga u af duuban tahay, waxa meesha
ka baxay dantii dadka soomaaliyeed lahaayeen ee ahayd in ay helaan
dawladnimo u keenta amni iyo kala dambayn u abuurta nolol iyo xasilooni,
arimahani dhamaantood waa dayac iyo masuuliyad daro ka timi dadka
soomaaliyeed meelkasta oo ay ku sugan yihiin.
Xataa marka ay marayso amni iyo dawlad dhis ee aanay aheyn siyaasad
iyo wax kala jiidasho waxa ay ahayd in guud ahaan Jamhuuriyadii Somalia
ee burburtay oo kala noqotay Somaliland iyo Somalia la is kaashado, laga
mideysnaado in wax waliba oo dhib ku ah nolosha dadka , hadii ay tahay
argagixisada , tahriibka, mukhaadaraadka, ka ganacsiga dadka iwm la
iska kaashado , hadii la awoodana Gobolka Geeska Africa oo dhami iska
kaashado.
XALKU MUXUU NOQONAYAA , MAXAYSE SOMALIA KU DAMBAYN DOONTAA ?
Waa su'aal mudan in la isweydiiyo loona helo jawaab, sababta oo ah
macquul maaha mudo soddon sano ah in dadka soomaaliyeed ay wadnaha uun
farta ku hayaan oo ay ka werweraan dagaalo, qax , barakac , saboolnimo,
nabadgalyo daro iwm.
Maanta ilama aha maalintii wax kale laga fekeri lahaa in ay tahay aan
aheyn sidii dadka soomaaliyeed loogu abuuri lahaa nolol , deganaansho
iyo xasilooni waarta ama laba dawladood ha kala noqdaan ama hal dawlad
ha isku niqdeene, taasina waa masuuliyad u taala qofkasta oo in uun
dadnimo iyo damqasho somalinimo ku jirto oo uu leeyahay damiir ka
damqanaya waxii soomaali soo kala maray iyo waxa hada lagu jiroba.
Waxa ay u baahan tahay hogaan ka daacad ah in uu dadka wax u qabto oo
uu u soo celiyo nolol iyo dawladnimo rasmi ah oo aan ku tiirsanayn cid
kale , u tabaruca dadkiisa oo gaajo , guluf, dhaxan , roob iyo marxalad
kasta oo soo waajahda ugu adkeysta si loo gaadho barwaaqada dambe iyo
mustaqbalka wanaagsan ee ay Somalia yeelan doonto.
Muxamed Dhimbiil
Mohamed Abdi Jama
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!
Loading...
Loading...