'' Abidkii Rag Waa Go'i Jiree , Tanise Waa Gow ''.
Inaalilaah wa inaa ilayhi raajucuun .
Dr Siciid Sheekh Maxamed wuxuu ahaa , Adeerkay , Abtigey , Macalinkaygii
iyo Saaxiibkay , waxaanu ahyn muddo ka
badan 10 sanadood rafiiq waxaanan ka faaidaystay aqoon iyo khibrad aanay suurto
gal ahayn in meel kale lagga helaa .
Dr Siciid sheekh maxamed wuxuu ka baxay Dugsiga sarre ee Farsamada gacanta
Burco 1968 , ka dibna wuxuu tacliinta sarre ku qaatay wadanka Faransiiska ,
isagoo shahaadada sarre ee Phd ku diyaariyay Cilmiga dhaqaalaha .
Dr siciid wuxuu ka mid ahaa , Aasaasayaashii ururkii SNM , waxaanu ka
qayb galay shirwaynihii lagaga dhawaaqay snm 06-April 1981 , ka dibna wuxuu
noqday Gudoomiyihii ururkii snm ee wadanka Imaaraadka Carabta .
Dr Siciid oo u shaqaynayay Dawladda Imaaraadka Carabta , Jaamacadiisa Degree ilaa Phd ay ka bixisay dawladda Imaaraadku , waxaa lagga mustaafuriiyay wadanka Imaaraadka 1986 , ka dib markii dawladii Soomaaliya codsatay in loo dhiibo , isaga iyo 6 nin oo kale , saaxiibnimada u dhaxaysay isagga iyo imaaraadka ayaana sabab u noqotay in loo ogolaaddo in uu wadan sadaxaad u baxo , ilaa maantana waxaa diiwaanka imaaraadka ugu qoraa musaafir abadiya .
Dr Siciid wuuxu qaxoonti ku noqday wadanka kenya , waxaanu uga gudbay
wadanka Canadda 1987 , halkaas oo uu ka aasaasay mar kale xafiiska Snm ee
Canadda .
Dr Siciid wuxuu ka mid ahaa aqoon yahanadii qalinka kula dagaalamay Taliskii M S Barre , waxaanu maqaalo badan ku qoray wargaysyo badan , waxaanu ahaa nin mar walba warbaahinta caalamiga ahi ka waraysto waayihii ka jirey waagaa dalkii Soomaaliya , in badana wuxuu abaabulay mudaharaadyo waawayn .
Dhinaca kale , Dr wuxuu ahaa khabiir ku xeel-dheer cilmigga dhaqaalaha , waxaanu u shaqeeyey Wadanka Qatar , Qaramadda midoobay , waxaanu ka mid ahaa khubaradii ka qayb gashay dib u dhiska Haayadaha Wadanka Ruwanda ka dib burburkii wadankaas .
Dr Siciid oo ahaa , caalim Diinta Islaamka aqoon badan u leh , ehlu cibaado ah , waddani Somaliland jecel oo ay lafta iyo dhigga kaga jirto maanta ayuu u guurey gurigiisii xaqa ahaa , guud ahaan shacabka Somaliland , reer sheekh maxamed cabdale iyo ubadkiisii samir iyo iimaan ,Inaalilaah wa inaa ilayhi raajucuun .
W/Q: Ahmed Nour Guruje
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!