Isu-eekaanshaha Dhacdooyinka: Khilaafkii C/laahi Yuusuf iyo Nuur Cadde, Farmaajo iyo Khayre.
Cabdilaahi Yuusuf iyo Nuur Cadde”AHU”
Adduunka waxa inta badan
soo mara dhacdooyin xidhiidh meel badan ka wadaaga. Khilaafkii u dhaxeeyey
C/laahi Yuusuf iyo Nuur Cadde wuxuu meelo badan ka shabbahaa khilaafkan hadda
ka dhex taagan Farmaajo iyo Raysal wasaarihiisa Khayre. Sidii uu Raysal wasaare
Nuur Cadde cagaha isugu maray madaxweyne C/laahi Yuusuf, ayuu Raysal wasaare
khayrna cunaha kaga maran yahay Farmaajo. Cabdilaahi Yuusuf oo ciyaarta qaybtii
hore ka soo adkaaday Raysal wasaare Cali Maxamed Geeddi, ayaa badhtamihii
sannadkii 2008 ay mar kale is-qabteen Nuur Xasan Xuseen (Nuur-cadde).
Waxa la isku qabtay xil ka
qaadis uu Nuur Cadde ku sameeyey guddoomiyihii gobolka Banaadir Maxamed Cumar
Xabeeb (Maxamed Dheer), oo ahaa saaxiib aad ugu dhaw Cabdilaahi Yuusuf.
Cabdilaahi Yuusuf wuxuu liqi kari waayey in la ugaadhsado dadkii isaga ku
dhawaa, halka Nuur Caddena uu liqi kari waayey inuu madaxweynuhu ka hadlo
guddoomiye gobol oo shaqadiisa ah. Ka dib Cabdilaahi Yuusuf wuxuu qaaday dhawr
tallaabo oo ay ugu horrayso inuu si hoose ula heshiiyo wasiirrada oo ay is-casilaan
si meesha looga saaro Nuur cadde. 13 wasiir oo isugu jira ku xigeeno iyo wasiiro
ayaa hal mar is-casilay, Nuur cadde oo ka hortagaya dagaalka siyaasadeed ee
Mudugaysan ayaa markiiba soo magacaabay beddelkoodii.
Iyada oo khilaafku cirka marayo, ayaa labadoodiiba looga yeeshay Adiis Ababa oo wakhtigaasi arrintooda laga goyn jiray. Waxa lagu kala saxeexday heshiis dhigayey in dib loo soo magacaabo 13 xubnood ee wasiirrada iska casilay oo la aragti ahaa madaxweynaha iyo in aan dib loo soo celin duqii gobolka Banaadir Maxamed Dheer. Markaa garo oo Nuur cadde wuxuu aqbalay soo celin duqa gobolka Banaadir, halka uu ka tanaasulay inay dib u soo noqdaan xubnihii is-casilay.
Nuur cadde wuxuu isku dubaritay inuu xubnaha
baarlamaanka si hoose ula heshiiyo, si aanay ugu codeyn soo noqoshada xubnaha
is-casilay. Markii heshiiskii baarlamaanka la horkeenay ayaa ay diideen inay
ansixiyaan xubnihii hore isu casilay. Halkaasi ayaa qaybtii hore ciyaarta lagaga adkaaday Cabdilaahi Yuusuf. Shakhsiyan
labadan masuul waxa u dhexeeyey kala duwaansho abuuri ah. Cabdilaahi Yuusuf
qofka ay is-haystaan waa laga garan jiray inay col yihiin oo wejigiisa ayey ka
muuqan jirtay, halka Nuur-cadde aan weligii muuqaal ahaan iyo hadal ahaanba
laga garan jirin cidda ay col yihiin. khilaafkaasi oo heer kala duwan soo maray
aakhirkii wuxuu keenay inuu Nuur-cadde laba uu isla helay, kow taageerada
beesha caalamka iyo xubnaha Baarlamaanka Soomaaliya gaar ahaan beesha Hawiye.
Ka dib Cabdilaahi Yuusuf ayaa is-casilaad ku dhawaaqay 29/12/2008. Wuxuu yidhi
beesha caalamka ayaan caddaadis kala kulmay.
Farmaajo iyo Khayre
Dawladda Farmaajo ayaa
dhawr jeer si fagaare ah ugu faantay in aanay is-khilaafin madaxweynaha iyo
Raysal wasaaruhu, hasayeeshee taasi imika meesha way ka baxday. Shakiga iyo
khilaafka u dhexeeya labadan masuul ee haatan xilka haya, ayaa curtay ka dib
kulankii dhexmaray labadii madaxweyne ee ka horreeyey Farmaajo oo aanu wax
kaalin ah ku lahayn Raysal wasaare Khayre. Kulankaasi booskii Raysal wasaare
Khayre waxa fadhiyey oo sida muuqatay lagu beddelay taliyaha sirdoonka Fahad
Yaasiin. Raysal wasaaraha ayaa kulankaasi u arkayey mid isaga meesha lagaga
saarayo oo uu Farmaajo heshiis qarsoodi ah kula galaayo.
Wuxuu Raysal wasaaruhu
is-tusay in Farmaajo mucaaradkiisa isaga sasabaayo inuu Raysal wasaare iyo
lacag u ballan qaado si ay u taageeraan oo meesha looga saaro Khayre. Taasi
beddelkaad ayuu Khayre qaatay go’aan u gaar ah oo ka dagaallamo qorshaha isaga
ka dhanka ah. Xulufada Farmaajo la safan waxa ugu tunweyn, Fahad Yaasin, Raysal
wasaare ku xigeenka Khadar iyo guddoomiyaha aqalka hoose ee Baarlamaanka
Mursal. Raysal wasaaraha ayaa haysta taageerada inta badan madaxda
maamul-gobleedyada, guddoomiyaha aqalka sare iyo xayn yar oo ka tirsan golaha
wasiirrada. Khayre wuxuu ka cabsi qabaa haddii ay muddo kordhini timaado in
isaga uu Farmaajo meesha ka saarayo, oo Raysal wasaare cusub oo mucaaradka uu
ka soo xusho Farmaajo lagu beddeli doono. Markaa waa inuu geed dheer iyo mid
gaabanba u fuulaa sidii meesha looga saari lahaa waxa muddo korodhsi ah.
Amarkii ciidamada Hadhimacadka lagaga saaray magaalada Dhuusamareeb waxa toos u bixiyey Khayre oo kalsooni ka haysta madaxweyne-goboleedka Galmudug Qoor Qoor. Markaa fursada ay heleen maamul-goboleedyadu waxa soo salaxay Khayre oo taageero ka haysta inta badan madaxda maamul-gobleedyada iyo guddoomiyaha aqalka sare. Haddaba waxa ay su’aashu tahay keebaa daaqada laga saari doonaa?
Cali Cabdi Coomay
Suxufi, qoraa ah.
Hargaysa, Soomaalilaan
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!