Hargeysa(HWN):-Muuse Biixi ayaa qorshaynaya inuu maxkamada sare u gudbiyo go'aan ay ka gaadho saami qaybsiga kuraasta golaha wakiilada.

warar xogogaal ah ayaa xaqiijiyey in kulamadii ugu dambeeyey ee xisbiyada lagaga hadlay saami qaybsiga kuraasta golaha wakiilada iyaga oo qorshaynaya in lagu galo sidii hore ee la isticmaalay 2005.

Muuse Biixi ayaana hada qorshaynaya inuu maxkamada sare u gudbiyo go'aan ka gaadhida saami qaybsiga isaga si gaar ahna u bilaabay kulamo siyaasadaysan oo ku wajahan in Reer Awdal lagu qanciyo inay aqbalaan in doorashada wakiilada lagu galo saamigii 2005.

Wararka ayaa sheegaya in maalmaha soo socda uu Muuse Biixi u gudbin doono maxkamada sare codsi ku saabsan inay go’aan dastuuri ah ka soo saarto saami qaybsiga kuraasta golaha wakiilada si loogu diyaar garoobo qabsoomida doorashada.

Muuse Biixi ayaa talaabada uu qaadayaa ay tahay mid muujinaysa inuu ku dhiiran waayey go’aan ka gaadhida saami qaybsiga kuraasta golaha wakiilada, iyada oo dadweynaha gobolka Awdal iyo gobolada barigu ay si weyn uga soo horjeedaan in lagu galo saami qaybsigii hore ee la isticmaalay doorashadii qabsoontay 2005.

Dhinaca kale dadweynaha gobolka Awdal oo si xoog ah uga soo horjeeda in saami qaybsigii hore lagu galo doorashada baarlamaanka isla markaana doonaya in loo kordhiyo ayaa kulamo siyaasadaysan oo ay dhalinyaradu abaabulayaan ka bilaabay magaalada Boorama kuwaas oo ay ku soo bandhigayaan sida aanay u aqbalayn in saami qaybsigii 2005 lagu galo doorashada golaha wakiilada.

Si kastaba ha ahaatee waxa la dhawrayaa go’aanka ay maxkamada sare ee somaliland ka gaadho saami qaybsiga kuraasta golaha wakiilada.