Rabshadaha ka socda Addis Ababa ayey illaa iyo hada ku dhinteen sida la xaqiijiyey ugu yaraan 81 qof, waxaana Arbacadii magaalada Caasimada ah la geeyay ciidamo baddan oo militari ah si ay uga hortagaan kooxaha kacdoonka wada.

Fanaan Hachalu Hundessa oo kamid ahaa mucaaridka xukuumada Abiy Axmed ayaa la toogtay Isniintii la soo dhaafay, waxaana la sheegay in dilkiisa uu ahaa mid qorsheysan.

Raysal-wasaare Abiy Ahmed ayaa sheegay in dilkan ay ka danbeysay dowlad shisheeye inkasta oo aanu si cad u sheegin isagoo sheegay in dilkan loo adeegsaday kooxo aanu magacaabin oo ka dhex shaqeynaya gudaha Itoobiya, waa siduu hadalka u dhigayee.

"Kuwo soo qorsheeyay dambigan kumay faraxsaneyn isbaddallada haatan ka socda dalka, hadafkoodu kaliya ah ma aheyn inay dilaan walaalkeen Hachalu balse wuxuu hadafkoodu ahaa inay dilaan Itoobiya” ayuu yidhi Abiy Axmed.

Abiy ayaa wajahaya kacdoon shacab xili ay loolan kula jiraan siyaasiyiin badan oo ka soo jeeda Qoomiyada uu u dhashay ee Oromada oo si weyn u dhaliilsan xukuumadiisa.

Fanaanka la dilay ayaa kamid ahaa mucaaridkiisa raggii sida weyn uga soo qeyb qaatay kacdoonka Oromada waday sanadihii la soo dhaafay, wuxuuna fanaankaasi ka hor intaan la dilin wareysi uu siiyey warbaahinta Oromada uu ku sheegay in loo soo hanjabay.