Addis Ababa(HWN):-Dawlada federaalka ah ee Itoobiya ayaa soo bandhigtay khasaaraha la ogyahay ee ilaa hada ka dhashay mudaharaadadii ka socday magaalada Addis Ababa maalmihii ugu dambeeyey.

Taliyaha ciidanka booliska federaalka Itoobiya Getu Argaw ayaa warsaxaafadeed uu soo saaray waxa uu ku soo bandhigay khasaaraha labadii cisho ee ugu dambeeyey ka dhashay mudaharaadadii ka socday magaalada Addis Ababa.

Taliyaha ciidanka booliska federaalka Itoobiya Getu Argaw ayaa sheegay in mudaharadadii ugu dambeeyey looga dan lahaa inay magaalada Addis Ababa ka dhacaan rabshado mudo badan sii soo socda kuwaas oo uu cadeeyey inay keeneen khasaare naf iyo maalba iskugu jira.

Taliyaha booliska federaalka Itoobiya Getu Argaw ayaa warsaxaafadeedkiisa ku sheegay in magaalada Addis Ababa lagu dilay toban qof oo dilalkooda loo isticmaalay dhagaxaan lagu garacay, toogasho iyo qaraxyo, waxaanu xusay in laba ka mid ahi ay ahaayeen ciidamada booliska isla markaana la dhaawacay 57 kale oo ka mid ah ciidamada amaanka.

Taliyaha booliska federaalka Itoobiya ayaa sidoo kale sheegay in rabshadihii Addis Ababa lagu jajabiyey baabuur gaadhaysa 250 gaadhi halka 20 kalana la gubay isaga oo sheegay in xisbiyada siyaasada qaarkood ay saamayn toos ah ku lahaayeen kicinta dadweynaha.

Sidoo kale xubnaha xisbiyada mucaaridka ah ee dhaqdhaqaaqa Amxaarada iyo Balderas ayuu ku eedeeyey inay isku dayeen kicinta rabshado wadaag ah oo dalka ka dhaca.

Taliyaha ciidanka booliska federaalka Itoobiya ayaa sidoo kale sheegay in magaalada Addis Ababa ay rabshado xoogan la kulantay labadii maalmood ee ugu dambeeyey kuwaas oo uu sheegay inay ka dhasheen burburka hanti gaar loo leeyahay oo dadweynaha laga baabiiyey iyo hanti ay dawladu lahayd, isaga oo intaas raaciyey in laga hortagay dhawr isku day oo la doonayey in boob lagu gaysto.