Addis Ababa(HWN):-Xeer ilaaliyaha guud ee dalka Itoobiya iyo ciidamada booliska ee dawlada federaalka ah ayaa war saxaafadeed ay soo saareen kaga waramay wakhtiga maxkamada la horkeeni doono siyaasiga Jawar Maxamed, gudoomiyaha xisbiga mucaaridka OFC Bekele Gerba iyo dad gaadhaysa 35 qof oo wehelinaya.

Taliye ku xigeenka ciidamada booliska federaalka ee Itoobiya Zelalem Mengiste ayaa warsaxaafadeedka ay soo wada saareen xeer ilaaliyaha ku sheegay eedayn uu dusha u saaray siyaasiga Jawar Maxamed iyo dadka la xidhan isaga oo tilmaamay inay doonayeen soo celinta dilal badan oo uu sheegay inay dhaceen 22 june 2020.

Taliye ku xigeenka Ciidanka booliska federaalka Itoobiya ayaa sidoo kale sheegay in arimaha loo haysto siyaasiga Jawar Maxamed, gudoomiyaha xisbiga OFC Bekele Gerba iyo 33 qof oo kale inaanay la xidhiidhin maydka heesaagii oromada ahaa ee Haacaaluu Hundeessaa balse loo haysto qorshe la doonayey in lagu soo celiyo dilalkii qorshaysnaa ee dhacay dabayaaqadii bishii June.

Sidoo kale markii la qabtay Jawar Maxamed, gudoomiye Bekele Gerba iyo 33 qof ee kale ayuu maalintii salaasada taliye ku xigeenka ciidanka boolisku u sheegay warbaahinta in qabashadoodu timid ka dib markii ay dileen askari ka tirsan ciidamada amaanka maamulka oromada ka dib markii uu iska hor imaad ka dhacay xarunta dhaqanka oromada oo ku dhaw fagaaraha Meskel ee magaalada Addis Ababa.

Taliye ku xigeenka ciidamada booliska federaalka Itoobiya ayaa intaas raaciyey in iska hor imaadku dhacay ka dib markii ay isku dhaceen ciidamada amaanka ee dawlada iyo koox uu sheegay inuu hogaaminayey siyaasiga Jamar Maxamed kuwaas oo uu tilmaamay inay diidanayeen in fanaankii la dilay lagu aaso goobtii hada lagu duugay, waxaanu xusay inay kooxdaasi masuul ka ahaayeen dilka askari ka tirsanaa ciidanka.