Nuxurka Wadda Hadal Dhexmaray Madaxweyne Farmaajo Iyo Laba Raysal Oo Khadka Telefanka Kula Soo Xidhiidhay

Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa Khadka taleefanka kula hadlay Ra’iisul Wasaaraha Norway Marwo Erna Solberg.

Ra’iisul Wasaaruha Norway oo telefoonka kula soo xiriirtay madaxweynaha JFS waxay ummadda Soomaaliyeed ugu hambalyeysay 60-guurada ka soo wareegtay xornimada iyo midnimada Soomaaliya.

Madaxweyne Farmaajo Waxa uu uga mahadceliyey Norway kaalinta muhiimka ah ee ay ka qaadaneyso xoojinta hay’adaha dowladda iyo dib u habeynta dhaqaalaha dalka Soomaaliya.

Farmaajo iyo ra’iisul wasaaraha Norway ayaa sidoo kale ka wada hadlay xoojinta xiriirka labada dal iyo arrimaha ku saabsan doorashooyinka soo socda ee Soomaaliya.

Waa mas’uulkii labaad oo telefoonka kula soo hadlay Madaxweynaha JFS uguna hambalyeeya xuska 60-guurada xorriyadda Soomaaliya muddo ka yer 24 gudahooda,horey waxaa ula soo xiriiray ra’iisul wasaaraha Dalka Talyaaniga oo salaana uga siday madaxweynaha wadankaasi.

dhinaca kale Ra’iisul Wasaaraha Talyaaniga Giuseppe Conte oo xiriir dhanka telefoonka ah lasoo sameeyay Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa ugu hambalyeeyay sanad guurada 60-aad ee 1-da Luuliyo.

Giuseppe Conte wuxuu salaan uga siday Madaxweynaha dalkaas Talyaaniga Mudane Sergio Mattarella, Mas’uuliyiinta ayaa sidoo kale ka wada hadlay xoojinta xiriirka labada dal.

Qoraal kooban oo uu soo dhigay bartiisa Twitterka Madaxweynaha Jamhuuriyadda Federaalka Soomaaliya mudane Maxamed Cabdullaahi Farmaajo ayuu uga mahad celiyay madaxdaasi sida ay xiriirka ula soo sameeyeen, isla markaana ay la qeybsadeen hambalyada xuska todoobaadka xorriyadda Soomaaliya.

Marka laga soo tago dalka Talyaaniga waxaa jira madaxda wadamo badan oo caalamka ka mid ah, kuwaasoo u soo hambalyeeyey Soomaaliya oo u dabaaldegtay sanadguuradeedii 60-aad ee xoriyadda iyo midnimada dalka, waxaana ka mid ah Midowga Afrika, Carabta, sida Boqortooyada Sacuudiga, Qatar, Baxreyn, Falastiin, Turkiga, Shiinaha, Mareykanka iyo hogaamiyeyaasha dalal kale.