Golaha Wasiirrada ee xukuumadda federaalka Soomaaliya ayaa kulan ay maanta yeesheen kasoo saaray go'aan lagu asteeyay xilliga dib loo billaabayo duullimaadyadii gudaha dalka ee hakadka ku jiray.

Amarka lagu joojiyay dhaqdhaqaaqyada diyaaradaha ee isaga kala gooshi jiray magaalooyinka Soomaaliya ayaa looga gol lahaa si loo yareeyo fiditaanka cudurka safmarka ah ee coronavirus, oo saameyn ballaaran ku yeeshay waddanka.Shir golaha wasiirradu maanta ay yeesheen oo uu guddoomiyay ku simaha Ra'iisul Wasaaraha ahna Ra'iisul Wasaare ku-xigeen, Mahdi Maxamed Guuleed, ayaa lagu oGgolaaday in dib loo furo duullimaadya gudaha si loo fududeeyo isu socodka Bulshada iyada oo lagu dhaqmayo talooyinka xakameynta faafitaanka COVID-19.Golaha ayaa dood dheer oo ay yeesheen kaddib waxay cod aqlabiyad leh ku fasaxeen in si taxadar leh loo sameeyo arrintaas.

Maalinta Axadda ah ee taariikhdu tahay 5-ta bishan July, 2020-ka ayaa la furayaa duullimaadyada gudaha, sida lagu shaaciyay go'aanka kasoo baxay golaha wasiirrada.

Maalintiiba hal diyaar ayaa loo oggol yahay inay tagto halkii dowlad goboleed.

29-kii bishii Maarso ayuu dhaqan galay go'aanka ay wasaaradda gaadiidka iyo duulista hawada ku soo saartay in la hakiyo duullimaadyadii gudaha Soomaaliya.

19-kii isla bishaas ayaa la joojiyay dhammaan duullimaadyadii caalamiga ahaa ee tagi jiray garoonka diyaaradaha Aadan Cadde ee magaalada Muqdisho, taasoo iyana qeyb ka ahayd dadaallada lagu xakameysano fayraska sababay cudurka safmarka ah.

Qaar ka mid ah shacabka ayaa dood ka keenay hakintii lama filaanka ahayd ee duullimaadyada gudaha, iyagoo ka cabanayay khasaare maaliyadeed oo kasoo gaaray.

Hase ahaatee dowladda federaalka ayaa ku adkeysatay in tallaabadaas ay ahayd mid ku qotonta dadta guud ee shacabka.

Wasiirka Gaadiidka iyo Duulista Hawada ee Soomaaliya, Maxamed Cabdullaahi Salaad Oomaar oo BBCda u warramay xilligii uu soo saaray amarka joojinta duullimaadyadii guadaha ayaa sharraxaad ka bixiyay tallaabadaas oo ku timid si deg deg ah oo aan digniin laga sii bixinin.

"Si loo xakameeyo cudurka coronavirus waa in isu socodka la yareeyo, waxaana lagu yareeyn karaa oo ugu horreeya waa duullimaadyada oo la joojiyo, sidaa awgeed waxaan hakad gelinnay si ku meel gaar ah duullimaadyadii waddanka gudahiisa ahaa. Runtii hal maalin oo safar la fasaxo ayaa waxaa ka iman kara wax aad u weyn, marka hadda xilligan aan ku jirno xilli laga hadlo tikidhyo lacagtooda lumay iyo wax la mid ah ma aha. Waa xilli loo baahan yahay in la isgarab istaago, la isu dulqaato, la fiiriyo danta guud iyo badqabka dadkeenna." ayuu yiri Oomaar.

Duullimaadyada gudaha ee Soomaaliya ayaa dad badan oo ah inta awoodda waxa ay u sahlaan inay si fudud ugu kala gooshaan magaalooyinka gudaha dalka, maadaama inta badan waddooyinka isku xira gobollada ay burbursan yihiin, meelaha qaarna aan ammaankooda la isku halayn karin.

BBC