Hargeysa(HWN):-Wajigii labaad ee shirkii wadda hadalka somaliland iyo soomaaliya ayaa maalintii sadexaad ka socda wadanka Jabuuti.

Shirka labada dhinac oo ay maanta iskugu yimaadeen guddiyadii farsamo ee la magacaabay ayaa wararka hordhaca ah ee ka soo baxayaa ay soo bandhigayaan qodobadii ugu muhiimsanaa ee lagaga hadlay.

Wararka laga helayo shirka laysku hor fadhiyo wadanka Jabuuti ayaa sheegaya in maanta diirada la saaray dhawr qodob oo muhiim ah kuwaas oo si weyn layskugu soo dhawaaday.

Qodobada laga wada hadlay ayaa waxa ka mid ahaa.

1. Wararka laga helayo shirka ayaa sheegaya in labada dhinacba ay ogolaadaan in la furo isku socodka gaar ahaana kan siyaasiyiinta iyada oo la ogolaanayo in masuuliyiinta xilalka ka haya labada dhinacba ay isku talaabi karaan.

2. labada guddi ayaa isku raacay inay si wadda jir ah uga shaqeeyaan hanaanka deyn cafinta isla markaana ay xidhiidh toos ah wada yeeshaan wasiirada maaliyada ee soomaaliya iyo soomaliland.

3. labada guddi ayaa isku raacay in magaalada Hargeysa xarun u noqoto maamulka hawada Soomaaliya, qodobkaas oo ka mid ahaa heshiisyadii hore loo gaadhay balse aan fulin, waxaana laysku afgartay in wakhti kooban lagu hirgeliyo.

4. labada guddi ayaa isku afgartay in kaalmo dhaqaale oo dheeraad ah ay hesho somaliland kuwaas oo ay ku jiraan maalgashiyada waa weyn ee dawlada federaalka ahi saxeexdo.

5- Deeqaha waxbarashada iyo nooc kasta oo ay ku jiraan kuwa Milateri, laguna helo magaca Soomaaliya in somaliland ay qaybteeda hesho ayaa layska raacay, iyada oo la siinayo kooto gaar loogu tala galo taas oo guddi gaar ahi cayimi doonaan.