Xisbiga mucaaradka ah ee Wadajir, islamarkaana uu hoggaamiyo siyaasiga Cabdiraxmaan Cabdishakuur Warsame ayaa war cusub ka soo saaray hadalkii dhowaan ka soo yeeray Ra’iisul wasaaraha Soomaaliya, Mudane Xasan Cali Khayre ee ahaa in waqtigeeda ay ku dhici doonta doorashada 2020 illaa 2021-ka.

Qoraalka xisbiga Wadajir ayaa waxaa ugu horreyn lagu soo dhoweeyey go’aanka Ra’iisul wasaaraha ee ku aadan qabsoomida doorashooyinkaasio oo isugu jira baarlamaanka iyo mida Madaxweynaha.

Sidoo kale xisbiga ayaa ka dalbaday Khayre inuu hadalkiisa u bedal ficil, isla markaana xukuumaddiisa ay qaado tallaabooyin lagu abuuri karo Jawi wada-hadal oo dhex mari karo madaxda dowladda federaalka iyo sidoo kale saamileyda siyaasadeed ee dalka.

Xisbiga Wadajit ayaa sidoo kale intaasi ku daray inuu dhiira-gelinayo fahamka Ra’iisul wasarae Kheyre ee mudnaantiisu tahay doorashada iyo muhiimada ay u leedahay xasiloonida dalka in afartii sano mar la qabto doorasho la isku raacsan yahay.

Ugu dambeyn xisbiga Cabdiraxmaan Cabdishakuur ayaa ku baaqay in meel looga soo wada-jeesto cid kasta oo carqlad ku ah doorashooyinka soo socda ee Soomaaliya.