Sh. Aadan Siiro Oo Siilaanyo Ku Ammaanay Kobcinta Dhaqaalaha, Muusana Usoo Jeediyay In Uu Ku Daydo.
Hargaysa (HWN) Sh. Adan Xaaji Maxamud Xiiray (Aadan Siiro) oo kamid ah culumada waawayn ee Somaliland ayaa sheegay in intii ay dalka maamulaysay xukuumada uu Hogaamiyo Muuse Biixi uu dhaqaalihii dalku khal khalwayn galay.
Waxaanu usoo jeediyay Muuse Biixi in uu dhaqaalaha kaga daydo xukuumadii ka horaysay ee uu Hogaaminayay madaxwayne Axmed Maxamed Maxamuud (Siilaanyo) oo ahaa khabiir xaga dhaqaalaha aad ugu wanaagsanaa "Dawladii kaa horaysay madaxwayne dhaqaaluhu wuu shaqaynayay, dadkuna rajo ayay ku noolaayeen, waxbaa lakala iibsanayay, dhaqaaluhu sifiican ayuu ushaqaynayay, dhaq-dhaqaaqiisuna wuu wanaagsanaa, laba sababood baana ugu wacnaa In dhaqaalaha xukuumadaasi ay wanaajiso, waa marka koowaade dad wadatashanaya ayay ahaayeen iyo dad waxayar ee dalku leeyahay laba meelood dadka ku celiya ayay ahaayeen, meesha xataa ay qaataana dad dalka dib u geliya ayay ahaayeen” ayuu yidhi sheekhu.
Sheekha ayaa intaasi ku daray "Maanta madaxwayne wixiiba aday kugu urureen, waxaanu kuleenahay dadkii way soo ooteene dhaqaalaha fur fur”.
Sheekha ayaa ka digay in dhaqaalaha dalka oo xumaadaa
uu sababi karo dhibaatooyin ku yimaad amniga dalka iyo guud ahaanba qaab
nololeed ummada Somaliland, waxaanu usoo jeediyay madaxwayne Muuse Biixi inuu
ku daydo dawladii Siilaanyo "Haddanad waxba ku soo kordhinayn dhaqaalaha
madaxwayne nidaamkii kaa horeeyay raac, hadaanad ogayna dalka waa lagu
bakhtiyayaaye cid udiro kuu soo eegta, baahidu haday badatana nabad gelyada
ayay waxyeelaysaa, nidaamkan aynu unoolnahay oo dhan ayaa isbedeli haddii
baahidu badato” ayuu Sheekhu ku sheegay shir jaraa'id oo uu qabtay.
Intii uu xukunka hayay Muuse Biixi ayuu dhaqaalaha Somaliland uu hoos udhac wayni ku yimid sida ay ku doodayaan dadka aqoonta dhaqaalaha lihi, waxaana taasi uraacday shacaka dhibaatada uu sababay xanuunka Covid-19.
Hadhwanaagnews
Hargaysa/Office.