'' Dadku Wuu Inala Socdaane Ogaada '. Ahmed Nour Guruje
Goortu waa habeenimo , suuqaasina cabaar ayuu ka durugsan yahay suuqyadii aanu islahayn waa la idinka garanayaa , wadadu waa jaam , Askarina meesha waabay ka dhawdahay .
Dabeeto markii aanu aragnay shilka , waxaanu baabuurkii ka saaray wadadii , ka dibna waanu kasoo degnay , waxaana aanu u nimi baabuurkii kale oo wadada weli dhexyaala iyo wiilkii dareewalka ahaa oo isna kasoo degey oo baabuurkiisii eeg eegaya .
Salaan ka dib , waxaanu wiilkii u sheegnay in aanu qaladka leenahay maadaama anagu aanu wadada ka talaabaynay , khasaarahana aanu qaadanay , sidaa darteed aanu ka wada xaalo sidii baabuurka loo samayn lahaa .
Wiilku waa inan yar oo qiyaastii labaatan jir uun ah amaba waxyar dhaafay ,waxaana la socda wiil kale oo aan waxba ka waynayn , baabuurkiisuna waa nooca loo yaqaano Dukhaanka ee Magaaladda ka dhex shaqeeya , inta aanu la hadlaynay wiilku kor iyo hoos buu noo eegayay , anana jawaab baanu ka sugaynay tolow muxuu odhan , ma Tarafiga inooga yeedha , ma geerasha ina geeya , bal adba .
Cabaar markuu aamusnaa ayuu wiilku nagu yidhi , Saw ninka Guruujej la yidhaahdo ma tihid , haa baan ku idhi , anoo hoosta iska idhi tolow yaa kuu sheegay , dabeeto wuxuu yidhi , Waanu kula soconaa , nin wanaagsan baad tahaye iska tag waxba lagu waydiin maayee .
Maadaama aniga iyo saaxiibkay aanu eegnay duqada baabuurka oo ay noo muuqatay , waxaanu ka codsanay in uu Telefoonka nagga qorto , baabuurkana geerash geeyo , wixii kharash ku baxayana noosoo sheego si aanu ugu dirro ,hassa yeeshee wiilkii wuu naga diiday , ugu dambayn wiilkii yaraa waxaanu ku qancinay in uu telkiisa isugu noo qoro oo aanu is xukuno , taana dirqi buu ku yeelay , waxaana uu nagu yidhi ugu dambayn hadaad wax iisoo dirtaan imikaba jaad uun iisoo dira waxba idinka dooni maayee .
Wiilkii hadaanu is yara waraysanay wuxuu noo sheegay in uu kobtan Facebook nagala socdo , xogta uu naggu qiimaynayaana ay intaa tahay , sidii baana aanu wiilkii ku kala amba baxnay, sidaa darteed dadka aanu halkan deriska ka nahay guud ahaan waxaan u sheegayaa dadku wuu inala socdaaye ogaada .
Ramadaan wanaagsan .
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!