Hargeysa(HWN):-Xukuumada somaliland ayaa xabsiga dhigtay fanaaniin ka tirsan kooxda xidigaha Geeska iyo qaar kale oo ka soo laabtay magaalada Muqdisho ee caasimada Soomaaliya.

Warar soo gaadhay Hadhwanaagnews ayaa xaqiijiyey in ciidamada boolisku ay xabsiga ku hubsadeen afar fanaan oo qaarkood ka tirsan yihiin kooxda Xidigaha Geeska kuwaas oo ka soo laabtay magaalada Muqdisho.

Wararka ayaa sheegaya in fanaaniintan oo kala ah Barwaaqo Qalanjo oo ka tirsan kooxda xidigaha Geeska, Saalax Carab iyo Xamda Qaali ay ku xidhan yihiin xarunta dembi baadhista, iyada oo wararku xaqiijiyeen in ciidamada dembi baadhistu ay sheegeen inay iyagu haystaan fanaaniintan ka soo laabtay magaalada Muqdisho.

Sidoo kale fanaanada Ifraax Hargeysa oo iyaduna ka tirsan kooxda xidigaha Geeska ayey wararku sheegayaan inay ku xidhan tahay saldhiga xaafada Cabdi Iidaan ee magaalada Hargeysa, iyada oo ilaa hada aan la cadayn sababta keentay xadhigeeda.

Xadhigan ayaa ku soo beegmaya iyada oo xukuumada talada haysa ee Muuse Biixi ay si gaar ah u ugaadhsanayso fanaaniinta iyo suxufiyiinta safarada ku taga magaalada Muqdisho ee caasimada Soomaaliya.