Labadan Qof oo dumar ah ayaa lagu hayaa Magaalada Jigjiga ee Xarunta Dawladda deegaanka Soomaalida, waxaana laga qaaday dheecaano si loo hubiyo in Xanuunka hayo iyo kale.

Sidaana waxa xaqiijiyey Wasiirka Caafimaadka Dawladda deegaanka Soomaalida Itoobiya, Dr. Yuusuf Maxamed oo Shalay Saxaafadda la hadlay, waxaanu sheegay in labada Dumarka ah ee laga shakiyey midkood ka timid Magaalada Burco oo Somaliland ah, Xaaladdeedana lagu ogaaday Magaalada Wajaale oo ay safar ku tagtay.

Wasiirka oo Arrimahaa ka hadlayaana wuxuu yidhi "Xaruntii aanu diyaarinay waxa jooga laba Gabdhood, mid waxay ka timid Diridhaba da’deeduna waa 24 jir, taas oo looga shakisan yahay Cudurka, Gabadh kale oo 45 jir ahina waxay ka timid Burco oo ay gaadhay, wayna ka soo noqotay,  waxaana laga soo gudbiyey Wajaale, dhiiggagii looga baahnaa waanu ka qaadnay, natiijadana Addis Ababa ayaanu ka sugaynaa..”

Wargeyska Geeska Afrika ayaa Cadadkiisii Arbacadii Shalay baahiyey Warka sheegaya in Haweenay u dhalatay Qoomiyadda Oromada oo Da’deedu tahay 45 sano jir oo ka timid Magaalada Burco looga shakiyey Xanuunka Covid_19, ka dib markii Koox Caafimaad oo ku sugan daanta Itoobiya ee Wajaale ay hubin mariyeen, taasi oo loo gudbiyey Magaalada Jigjiga.