Cabdillaahi Ibnu Cabbaas baa mu'addinkiisii ku yidhi maalin roob da'ayo: "Adaanka ha odhan 'حَيّ على الصَّلاة' 'Salaadda u kaalaya' balse waxa aad tidhaahdaa 'صلّو في بيوتكم' 'Gurgihiinna ku tukada". Arrintaa dad baa dhibsaday. Dabadeed Ibnu Cabbaas baa ku yidhi: "Miyaa ila yaabban tihiin? Mid aniga fadli badan baa sidaa yeelay" Isagoo Suubbanaha SCW ujeeda. Xidhitaanka masjidka iyo baajinta jamaacadaba waxa uu ku sababeeyey in uu dhibsanayo dhooqada iyo dhiidhiga ay dadku soo dhex qaadayaan. Xadiisku Bukhaari iyo Muslim buu ku yaalla.

Masjidkii dhiiqada roobka loo xidhay ee Nebigii Ilaahay iyo Saxaabadiisii ay u xidhayeen, maanta oo uu jiro cudurkaa safmarka ah ee ilbidhiqsiyada ku gudbaya ayaa xidhitaankiisa la is ka baryayaa waa wax aad loola yaabo. Hadda waa masjidkii uu rasuulku SCW inna lahaa: 'Inta uu dhiidhiga roobku jiro guryihiinna iskaga tukada' ayaa culimadii Somaliland inna leedahay: "Karoone aawadii masaajiddada looma xidhi karo"! Runtii waa go'aan aan cilmi iyo caqli midna lagu salayn. Kaliya caaddifad bay ku go'aan qaateen. Kumana gardarna aragtidayda. Xukuummadda ayaa gefka oo dhan iska leh. Wadaaddadani talo aanay lahayn ayey gacmaha u gelisay. Markeeda horeba qaddiyaddani arrin maamul bay ahayd. May ahayn arrin fatwo. Haddana xukuumaddu waa inay go'aan qaadataa. Hadday fatwo ka maarmi waydana culimada aqoon hadashay ee dunida islaamka ee kale fatwadooda ha raacdo.

Islaamku waa diintii naxariista iyo fududaynta.

"وَمَا أَرْسَلْنَاكَ إِلا رَحْمَةً لِلْعَالَمِينَ"

Ninkii reer miyiga ahaa ee masjidka Nebiga SCW ku dhex kaajay markii ay saxaabadu ku qayliyeen, Suubbanuhu waa kii ka celiyey. Hadalkiisii waxa mid ahaa:

"إنَّمَا بُعِثْتُم مُيَسِّرينَ ولَم تُبعَثُوا مُعَسِّرِينَ"
"Inaydun wax fudaydisaan baa laydiin diray ee inaydun wax adkaysaan la idiin ma dirin"

Rasuulkii ku cadhooday Mucaad oo salaadda dadka ku dheereeyey ee ku yidhi: "Mucaadow ma fidnowade ayaad tahay?" Tolow muxuu ku odhan lahaa kuwan ummadda Karoonaha u qaybinaya?!

Allahayow xaqa na tus, oo nagu toosi.