Jimcihii Nabiga Aan La Soo Tukoday!
Muddo tobaneeyo daqiiqo ah markii wacdigu socdo ayaa nin masjidkii ka dhex kacay isaga oo ku qaylinaaya "naaraa Takbiir”, gacanta midigna kor u taagahaaya, dadkii masjidka joogayna waxa ay ugu jiibiyeen "Allahu Akbar”. Saddex jeer ayaa uu ku Celiyay "Naaraa Takbiir”, dadkiina ugu jiibinayeen "Allahu akbar”. ereyo kale oo u dhignaa "Muxammad yaa mustafaa” ayaa uu haddana bilaaay, dadkiina jiibta ayaa ay ka adkaadeen iyaga oo ku dhawaaqaya ereyo u dhignaa "waanu jecelnahay”. Markii uu intaa dhameeyay dhidid waawaynina ka soo fax yidhid, inleen waa nin aad u dhawaaqayay’e, ayaa uu iska fadhiistay. Wadaad-kii khudbadda ku jiray isagu wali waa taaganyahay, si uu khudbaddiisa u sii wato waxa uu dhawrayay inta ninku dhamaynayo dhaqankaa la isla bartay ee shallaad-ka u eeg.
Khudbaddii ayaa uu wadaadku dib u bilaabay, markii uu waxoogaa wadoba, qinaayad yar oo Nabi amaan ah ayaa uu tirinayaa, Masjidkana jiibta ayaa isqabsanaysa. Micraaj-kii rasuulka ayaa uu ka warramayaa, waana sababta xuska nabiga iyo maansooyinka Nabi amaanka ahi ugu bateen khudbadda’e, markii la soo gaadhay wakhtigii Salaadda ee ahaa 1:45, waa la wada kacay, jamac looma kicin se sunne ayaa loo wada kacay, Sunnihii ka dib eedaan ayaa dhacay, khudbad kale oo Carabi ahna wadaadkii waa bilaabay, dhakkada ayaa uu khudbaddan ka akhrinayaa, isaga oo waliba sidii quraanka u dululuminahaaya.
Khudbadii Carabiga ahayd dhamaatay Wakhtigy marka uu maraayo 2:00-dii, ayaa aqiimkii dhacay salaadiina la tukaday, sida caadada ah imaamkan waxa hor taalla Sijaayda ama salliga uu ku tukiyo dadka mid kale oo aad u qurxoon, mar danbe ayaa la ii sheegay in nabiga loo asteeyay salligaa, waliba aad loo sii nadiifiyo lana cadriyo maalmahan oo kale.
W/Q: Cabdiqani Iid Cilmi
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!