Hargeysa(HWN):-Safiirka wadamada midawga yurub u qaabilsan soomaaliya Nicolas Berlanga ayaa la filayaa inuu maanta soo gaadho caasimada somaliland ee Hargeysa.

Sida ay sheegayaan wararka ku saabsan ujeedada socdaalkiisa, danjire Berlanga ayaa somaliland u imanaya dhamaystirka heshiiskii uu ka soo shaqeeyey ee ay kala saxeexdeen dhinacyada isku hayey doorashooyinka somaliland.

Heshiiskii xisbiyada somaliland kala saxeexdeen dabayaaqadii bishii February ee sanadkan oo dhabaha u xaadhayey in doorashooyinka isa saaran ee golaha wakiilada iyo goleyaasha deegaanadu ay ka dhacaan somaliland sanadkan 2020 ayuu haantan danjire Berlanga uu doonayaa in la waafajiyo heshiiska hanaanka farsamo ee loo wada shaqaynayo iyo shuruucda dalka isla marakaana loo bilaabi lahaa hawlaha shaqo ee guddiyada doorashooyinka.

Safiirka wadamada midawga yurub u qaabilsan soomaaliya Nicolas Berlanga ayey wararku sheegayaan in marka uu soo gaadho caasimada somaliland ee Hargeysa uu la kulmo doono hogaamiyaha somaliland Muuse Biixi Cabdi iyo gudoomiyeyaasha xisbiyada mucaaridka ah ee Ucid Iyo Waddani kuwaas oo uu kala hadli doono hanaanka loo fulinayo heshiiskii ay saxeexeen.

Xukuumada iyo xisbiyada mucaaridka ayaa 27-kii bishii hore madaxtooyada ku kala saxeexdeen heshiis lagu soo afjarayey khilaafkii ka taagnaa doorashooyinka kaas oo ka koobnaa 7 qodob oo aan ilaa hada la fulin.