Saraakiisha Ciidamada Dowladda ayaa habeen hore ciidan xoogan ku soo daadiyay wadooyinka iyo xaafadaha kala duwan ee Magaalada Dhuusamareeb, sida ay baahisay universaltv

Ciidamada Dowladda ayaana guri guri isugu dhiririyay xaafadaha Magaalada Dhuusamareeb, iyagoona hakad guud geliyay dhaqdhaqaaqii magaaaladaasi ka jiray.

Tani ayaa waxay ka dambeysay, ka dib markii gaadiid ay la socdeen dadweyne ka soo safray Magaalada Guriceel, kuna sii jeeday Dhuusamareeb ay Ciidamada Dowladda ku amrayn inay gaadiidka ka daataan, sababo ku aadan iyagoo aan gaadiidka ku taggi karin magaaladaasi.

Dadkan oo isugu jiray dhalin iyo odayaalba ayaa lug ku tagey Magaalada Dhuusamareeb, inkastoo duleedka magaaladaasi ay kaga hortaggeen masuuliyiin ka tirsan Ahlu Sunada Galmudug.

Dadweynaha ku dhaqan Magaalada Dhuusamareeb ayaa caro ka muujiyay habdhaqanka ciidamada iyo xayiraadihii ugu dambeeyay, ee ay magaaladaasi ku soo kordhiyeen.

Sheekh Maxamed Shaakir Cali Xasan, Madaxweynaha Galmudug ee garabka Ahlu Sunna oo arrintan ka hadlay ayaa ka digay in la caburiyo dadweynaha reer Galmudug.

Si kastaba ha-ahaatee Ciidamada Dowladda ayaa waxaa saaka lagu arkayaa barro amniga lagu xaqiijiyo, oo ay ka samaysteen wadooyinka Magaalada Dhuusamareeb.