Hargeysa(HWN):-Dawlada Soomaaliya ayaa waxa ay iska fogaysay in ay farogelin ku hayso maamul goboleedyada dalka ka jira, taas oo marar badan lagu eedeeyay.

Maxamed Cabdi Xayir Maareeye wasiirka wasaaradda warfaafinta ee xukuumadda Soomaaliya mar uu maanta la hadlay tvga ku hadla afka dowladda ayaa sheegay inaysan jirin wax faragelin ah oo ay ku heyso dawlada Soomaaliya maamul gobaleedyada dalka ka jira.

Wasiir Maareeye ayaa shaaca ka qaaday in madaxda maamul gobaleedyada hadalkooda ah in faragelin lagu hayo qeybo kamid ah ay tahay wax laga xishoodo maadaama dalka ay masuul ka tahay dowladda federaalka ah dastuurkana uu dhigayo in dawlada dhexe ay maamusho guud ahaanba dalka.

Hadalkan ayaa waxa uu ku soo aadayaa xilli madaxda maamul goboleedyada dalka ay dawlada Soomaaliya ku eedeeyaan in ay faragelin ku hayaan maamulada ay ka taliyaan, taasina ay dhalisay hadal hayn badan.