Daauud Cali Masxaf: Heesaagii, Codyaqaankii iyo Suugaanyahankii Galbaday (Qormada 1aad)
0
- Visits: 1870
-
- Share
Maanta oo Sooyaalku yahay 24kii Jeneweri 2020ka ayaan warbaahinta ku arkay geerida heesaagii, laxamaystihii iyo suugaanyahankii caanka ahaa ee Daauud Cali Masxaf Eebbe godka ha u nuuro oo ku geeriyooday magaalada Jijiga ee xarunta dawladda Soomaalida Itoobiya. Waxa aan tacsi u dirayaa ehelkiisii, qoyskiisii, bahda fanka iyo ummadda Soomaaliyeed guud ahaan.
Barnaamijkii fanka iyo suugaanta ee BBCda ayaa hilaad ku siman 2000
waraysi la yeeshay Daauud Cali Masxaf, waxaanu ka warramay waayihiisa
faneed. Waa barnaamijyada laga joojiyay laanta Soomaaliga ee BBC
muddadan dambe. Daqiiqadahaas ayaan si wanaagsan u dhuuxay. Sannadkii
2011ka oo aan Hargeysa isku aragnay ayaan waraysigaas xasuusiyay, waxa
uu u bogay sida aan u xafiday.Bandhiggii buugga Samadoon ee Abwaan
Ismaaciil Yusuuf Cabdi (Jiheeye) oo Jaamacadda Hargeysa lagu qabtay
ayaannu markaas ku kulannay. Sannadkii 2012ka waxa aanu ka wada
qayb-galnay afartan-guuradii qoraalka Afka Soomaaliga.
Labadan qormo ee gole-ka-fuulka ah waxa aan ku milicsan doonaa xogtii uu waraysigaas ku tebiyay muddada laga joogo labaatanka gu’. Weydiimaha loo bandhigay waxa ka mid ahaa heestii kowaad ee uu ku luuqeeyo, waxaanay ahayd:
Wax dhintaad ka samirtaa
Rejo waa la dhawraa
Wixii dhumayna doondoon
Yaad is dhiirrigelisaa
Dhabbaan ceel tegayn baan
Geel ku dheelmiyaayoo
Dhalandhool harraad baan
Nafta dhiganayaaye
Dhici weyday sidan rabay
Dhaawicina dillaacyoo
Waa dhaboobay jacaylkaan
Dheeldheelsanaayee
Dhagax dhuunta kama dego
Dhaayahaad ku aragtaa
Dhulka meesha doogga leh
…………………
Anna dhaawac baanoo
Dhibtu waygu badatoo
Dhidid iyo kulayl baa
Dhabannada ka da’ayee
Dhici weyday sidan rabay
Dhaawicina dillaacyoo
Waa dhaboobay jacaylkaan
Dheeldheelsanaayee
Fannaaniin kale oo badan ayaa dib u qaaday heestaas.
Heestii uu muddada ugu kooban laxanka iyo codka ku saaray waxa uu ku sheegay heesta la yidhaahdo Nuura. Waa hees caan ah.
Waa kuwan meerisyadeedi:
Nuuraay naruurooy
Nabad iyo nasteexiyo
Nugul caashaq beeriyo
Waxaad tahay naq iyo doog
Neecaw udgoon iyo
Nuurkii indhaha iyo
Qalbi-naaxintaydiyo
Waxaad tahay nur ii baxay
Aayihii naftaydaay
Nasiib tuu i siiyaay
Aan nolol wadaagnee
Ila naaxi caashaqa
Nuuraay Naruuroy
Nacab xaasidaa jira
Jecel nabarradeennoo
Neceb wada-jirkeennee
Nuxnuxlaha warkiisiyo
Garo naar afuufkuba
Inuu yahay nuxuus iyo
Nabaad-guurka caashaqa
Aayihii naftaydaay
Nasiib tuu i siiyaay
Aan nolol wadaagnee
Ila naaxi caashaqa
Isaga oo heestaas ka hadlaya waxa uu yidhi "Gabadh uu haasaawe naga dhexeeyay ayaan u qaaday. Waxaanay door ka qaadatay guurkayagii”
Marxuun Daauud Cali Masxaf oo la weydiiyay heestii uu muddada ugu dheer laxanka ku saaro ayaa yidhi
La soco qaybta labaad haddii Alle idmo.
Siciid Maxamuud Gahayr (Hargeysaawi)
[email protected]
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!
