Tartan adag oo ka socda Dhuusamareeb & wufuud ku qul quleysa
Magaalada Dhuusamareeb ee Caasimadda Dowlad goboledka Galmudug waxaa buux dhaafiyey Boqolaal isugu jira mas’uuliyiin iyo xil doonayaan maadaama halkaasi ay ka socdaan howlo doorashooyin ah.
Todobaadkaan gudihiisa waxaa Magaalada Dhuusamareeb gaarey xubno kala duwan,kuwaas oo qaarkood ay yihiin musharixiin Madaxweynenimo iyo tan guddoonka Baarlamaanka Galmudug.
Tartan adag ayaa ka jira Magaalada dhuusamareeb,waxaana kan ugu adag uu yahay laguna tijaabinayo awoodaha isku haya Galmudug doorashada guddoomiyaha Baarlamaanka oo ilaa iyo hadda ay isku soo taageen Saddex musharax oo laba kamid ah ay kasoo jeedaan deegaanka Ceeldheer iyo mid kasoo jeeda degmada Galhareeri ee Gobolka Galgaduud.
Wariyeyaasha ka howlgalla Magaalada Dhuusamareeb qaarkood ayaa waxaa ay sheegeen in magaalada ay ka duwan tahay sidii hore,isla markaana qof walba uu Tartan ugu jiro sidii uu xil uga heli lahaa Galmudugta Cusub ee dhismaheeda uu ka socdo Magaalada Dhuusamareeb.