Hargeysa(HWN):-Guddiga doorashooyinka ayaa la sheegay inay diideen inay xilka iska casilaan, iyada oo si caadi ah oo maalinle ah u wataan shaqadoodii.

Qaybo ka mid ah warbaahinta maxaliga ah ayaa ku waramaysa in guddiga doorashooyinka ee wakhtigani diideen soo jeedintii ergada dhexdhexaadinta ee ahayd in la kala diro lana soo magacaabo gudigii doorashada ee hore, waxaanay wararku sheegayaan in xubnaha guddiga doorashadu ay sidoodii caadiga ahayd u wataan shaqo maalmeedkooda.

Waxa kale oo ay wararku tibaaxayaan in xukuumada iyo xisbiyada mucaaridka ah midkoodna ka hawl galin sidii guddidan loogu qancin lahaa inay is casilaan isla markaana ay aqbalaan soo jeedintii guddida dhexdhexaadinta.

Xubnaha guddiga doorashooyinka oo uu Geeska Afrika isku dayay inuu arrintan wax ka weydiiyo ayaanay noo suurtogelin. Laakiin warkan ayaa ku soo beegmaya iyadoo ay shalay ku eekayd 10 January oo ah maalintii loo qabtay in Madaxweyne Biixi ku soo dhammeeyo fulinta labadii qodob ee ay ergadii dhexdhexaadintu soo saartay ee ahaa kala dirista guddigan iyo soo celinta guddigii hore, mana muuqdaan wax bidhaamo ah oo muujinaya in deg deg loo fulinayo labadaas qodob.