Sheeko Ka Dhacday Beel Deganayd Ethopia Iyo S/L Dhexdooda,Ruqe Ninkii Hayaa Ma Kaco Qaybtii 2aad

 

Mucjisadu waxay noqotay, Habeen walba dhawr Nin baa Daaqa loogu dhiiba Geela ballankuna ahaa marka aad Daaqa dhigtaan xaga Dambe ee Xerada oo suryo yari ku taalo ka baxa oo Guryihiinii ku nasata inta wareega kale ee Daaq guridu idin soo gaadhayo.

Marka ay gudaha hadaba galaan Ragga Daaqa sidaa ayay arkaan dhibaatada iyo lama filaanka gudaha Xerada ka dhacday oo Geelii wali Bahalkii ku dhex jiro si fiican oo kaydsi lehna u cunayo, kadib Ragii Daaqa siday wuxuu u qaybsamay:-

a) wax Muraala dilaaca oo halkii Naftu kaga dhacdo qaadan waa awgeed.

b) wax Isdhaafay ama Waashay kuna dul wareegaya Xerada iyagoo isla hadlaya oo aan Cidina fahmayn waxay ku hadlayaan iyaguse is leh wax u sheega Dadka iyo

c) wax Hunguri qaaday markii horena u dhashay Nin sooreed oo Bahalka dhiiga la caba (la boob) kadibna iyaguba ku Bahaloobay dhiigii kulana heshiiyay Bahalkii Dugaag"wixii dhacayaba dhankaaga qabsoo ma wada dhergnaa dhamaanteen”.

Halkaa Geelii waxa iskugu darsamay Bahal Dad iyo Bahal Dugaag. Geelu wuxuu ku ololayaa "Libaax qawdhamay oo qarsoonaa ayaa qoortiyo qawlalada ijaray mana qixi karoo waan u qalanahay”.

Markaad dib sheekada ugu noqoto, waxaad garan kartaa waxa keenay intaas oo mashaqo iyo burbur Dad iyo Xoolaba leh tii hore iyo tan dambe labadaba inay ahayd Baylah ciddii lahayd baylihisay "(Ruqe Ninkii lahaa dabada hayaa ma kaco)”.

Su’aasha meesha taalaase waxay noqotay, Ragga Geela soo dhiciyay ee intaas oo mur iyo deebaaq ah la soo maray Geelan hanbadiisa, waxay Eedda dusha ka saaraan Duqaydii Reerka u talinaysay oo aan Ood Fiican xoolaha kaga oodin Bahalka amba aan qaadan talo iyo qaylo dhaan wixii u imanayay.

Waxa kale oo iyana maan dhaaf iyo xusuus qor mudan Ubadka soo kacaya oo qaar badani ku waayeen Waalidkood raacdan Geela inay ku Eedayn doonaan Berito Raggan hadda hawsha Reerka wada inay.

Geela kusoo xareeyeen Xero ayna ka hubsan inuu Bahal ku jiro oo waliba Oodana ugu dheereeyay haddii wuxuuni ka cayntan lahaayeen.

Waxana Murugo mudan in tacabkii Ragani u ekaan doono " Hal bacaad lagu lisay”iyo farta dhexda ka qaniin mar labaad marka la ogaado sirta Xerada wakhti aan waxba laga qaban karin.

Waxa kale oo jawaab aan loo helayn ilaa hadda, Rag iyo Dumar wixii dhacdadan taariikhiga ah ama u dhintay ama ku daaduumay, taas oo qaarkood odhan lahaayeen haddii la maqlayo sidan:-

Maatidiyo dhallaankaan

Awgood u mayd ahay

Milic iyo kulaykii

Maalmihii i soo maray

Maska iyo Abeeskiyo

Mulacyadiyo Diinkii

Maalay qadhaadhiyo

Waxaan dhiiga ka muudsaday

Hadaan muusanaaboon

Xabaalaha ku madi ahay

Madax loo salaaxiyo

Maamus ha joogtee

Maandeeq Hashoodii

Midhadhkii usoo hadhay

Maxlal iyo miyuu Bahal

Misna wali ku maran yahay.

Waxa intii sheekadu socotay war deg-deg ah soo diray Nin ka mid ahaa Dadkii daaduumay oo xog waraystay sida Reerkii ku dambeeyay iyo inaan dhibtii wali ka dhamaan, balse aan lahayn awood uu ku soo noqon karo, wuxuuna warkiisu ahaa:-

Madadaalo iyo Been

Ninka madax u lulayaa

Marti Xoolahaagii

Ninka ay la mudantahay

Ma yeedhaan sidiisii

Ninka qosol la maqan wali

Mid subxaana laahiye

Ninka hoos ku malablaha

Mahad Eebbe weeye

Soo meero lagu yidhi

Mididiyo Fundhaalada

Ninka maydhayee qaday

Maangaab dadkaygow

Igu maqan dhibtiinuye

Mar labaad Xumaantii

Meesheedi gaadhoo

Madax qabasho mooyee

Mijo lama hawaystee

Intaan maaha sheekadu

Mooji mooyi lagu odhan

Intaan meel fog oo dheer

Mar labaad lagaa dayin

Masalaha intaan Cadaw

Ku mulaaqin dhoobada

Maxastiyo Carruuraha

Intaan maydku tiro badan

Masiibooyinkii hore

Hawlihii la soo maray

Maaxatoo Xumaantii

Meeraarta dhaaftee

Maqashiyo Baraarkii

Laga waa Mareegtee

Miyi iyo Magaalaba

Maad meeris xidhantaan?

Majabtaysi shaydaan

Meesha maad u diidaan?

Maqaar saarka ceebta ah

Maya maad tidhaahdaan?

Mudutuusha qaarkood

Malafsade Dhul jiifka ah

Maalooti iyo faan

Anakaa ku madhanoo

Mugga nama martee joog

Maruun maad tidhaahdaan?

Magawshoo ka maalee

Xigta maad ka murantaan?

Murdiyoo dhamaystoo

Muus muustay farahoo

Meegaate Haantee

Maamuus ma joogtee

Maad Mudacyo gelisaan?

Wax magaalo joogiyo

Kuwa maalka raacaba

Waa laga malaasoo

Nimco waa ka maqantee

Meehanoow Islaamkuye

Ma Dayrkii Makuu gubay?

Maqasheen ka dhagaleey

Ma Massjidbuu riday?

Sheekadan oo gunaanadkeedu u muuqan doono Huradayooy Toos, hadana wali waxaad moodaa inay arrini tahay "Dhegihii Alla waaniyaa waansama”.

Hadaba anigoo sheekadan goob joog u ahaa iyo adigoo akhriste ila dareensan hawsha culayskeeda wakhtigan xaadirka ah; Sideeynu u macnaysan karaa amba u fahmi karaa "Qof Muslima God laba jeer lagama wada qaniino”amba "Mar i dage Alla ha dago......”.????????

Qore:

Horow soco faarax......