Ciidamo ka tirsan booliska Soomaaliya ayaa xalay howlgal ka sameeyey inta badan xaafadaha degmada Boondheere ee gobolka Banaadir.

Ciidamada ayaa gudaha u galayey qaar ka mid ah guryaha ku yaalla degmada Boondheere, iyagoo baaritaan ku sameynayey.

Sidoo kale intii uu socday howlgalka oo isla xalay lasoo gaba-gabeeyey waxaa la arkayey ciidamada oo qab-qabanaya dhalinyarada ku nool xaafadaha degmada Boondheere, iyadoo la iskugu geeyey hal goob oo lagu kala saaray.

Dhalinyarada qaar ayaa laga soo saaray guryahooda oo ay ugu galeen ciidamadu, waxaana markii dambe la iska sii daayey, kadib baaritaan indha-indheyn ah oo ay ku sameeyeen ciidamadu.

Sidoo kale ciidamada samaynayey howlgalka oo ka tirsan booliiska Soomaliya ayaa markii uu soo dhamaaday howlgalku, waxay horay u sii ka xeysteen dhalinyaro fara ku tiris ah oo loo maleynayo inay uga shakiyeen falal amaanka liddi ku ah.