Muddadii uu kulanku socday, weftigu waxay yeesheen kulamo muhiim....
Magaalada Nairobi, dalka Kenya, ayaa martigelisay kulan ballaadhan oo is-xogwaraysi iyo khibrad-wadaag ah, oo ay ka qeyb galeen wufuud ka kala socday Baarlamaanka Jamhuuriyadda Somaliland iyo Baarlamaanka dalka Kenya.
Kulankan ayaa si gaar ah diiradda loogu saaray xeer-samaynta, qoondaynta miisaaniyadda, iyo sidii loo horumarin lahaa adeegyada bulshada, iyada oo la isku raacay muhiimadda wada shaqaynta labada dhinac.
Weftiga Somaliland ayaa ka koobnaa mudanayaal ka tirsan Golaha Wakiillada, xubno ka tirsan Golaha Xukuumadda, farsamayaqaano iyo khubaro ka shaqeeya Golaha Wakiillada, iyo sidoo kale wakiillo ka socday Hay’adda Badbaadada Carruurta (Save the Children). Kulamadan ayaa sidoo kale waxaa ka qayb galay Safiirka Somaliland ee dalka Kenya iyo Safiir-ku-xigeenka, kuwaas oo si toos ah uga qayb qaatay fududaynta iyo isku xidhka labada dhinac.
Muddadii uu kulanku socday, weftigu waxay yeesheen kulamo muhiim ah oo lagaga wada hadlay arrimaha sharci-dejinta iyo maamulka maaliyadda, iyadoo si gaar ah diiradda loo saaray habraacyada kala duwan ee xeer-samaynta, diyaarinta iyo ansixinta miisaaniyadda qaranka.
Xubnaha labada baarlamaan ayaa isla gartay in la xoojiyo habraacyada qoondaynta miisaaniyadda si ay si toos ah uga jawaabaan baahiyaha bulshada, gaar ahaan adeegyada muhiimka ah sida caafimaadka, waxbarashada iyo badbaadinta carruurta.
Kulankii ugu ballaadhnaa wuxuu ahaa mid ay si toos ah ula yeesheen mudanayaal ka tirsan Golaha Baarlamaanka Kenya, waxaana labada dhinac ay si furan uga wada hadleen waayo-aragnimada iyo dhibaatooyinka ka jira habraacyada xeer-samaynta iyo miisaaniyadda. Labada dhinac ayaa isla qaatay in wada shaqayn xooggan loo baahan yahay si loo xaqiijiyo in miisaaniyadda ay si dhab ah u adeegto horumarinta bulshada.
hadhwanaagnews 
