Saddexdii bil ee la soo dhaafay, Iran iyo Pakistan ayaa waxay ku qasbeen ku dhawaad 850,000 oo muwaadiniin Afghanistan ah oo aan sharciyeysnayn inay ku laabtaan Afghanistan, oo ay maamusho Taliban, sida ay mas’uuliyiintu sheegeen Axaddii.
Hawlgalka ka dhanka ah
dadka reer Afghanistan, ee sida sharci darrada ah u deggan dalalka deriska ah,
ayaa weli socda, inkastoo Qaramada Midoobay ay ka digtay in jiilaal daran iyo
mustaqbal aan la hubin uu sugayo dadka soo laabanaya, kaasoo ka jira qarankooda
saboolka ah.
Abdul Rahman Rashid, oo
ah wasiirka qaxootiga iyo dib u celinta ee Taliban, ayaa Isniintan u sheegay
kanaalka TOLO ee maxalliga ah in Iran ay masaafurisay "qiyaastii
345,000" oo Afghanistan ah ilaa toddobaadkii ugu dambeeyay ee bishii
Sebtember.
Isagoo aan bixin
tafaasiil dheeri ah, ayuu Rashiid sheegay in maamulka Taalibaan uu qoys kasta
oo soo laabtay siiyay deeq lacageed iyo gargaar kale oo degdeg ah.
Maamulka Iran ayaa
ballan qaaday in ay masaafurin doonaan dadka u dhashay Afghanistan ee sida
sharci darrada ah ku jooga dalkooda.
Saraakiisha Pakistan
ayaa sheegay in ku dhawaad 490,000 oo qof ay dib ugu laabteen Afghanistan tan
iyo markii ay dowladdu amartay in la qabto dhammaan ajaaniibta sharci darrada
ah, oo ay ku jiraan dad lagu qiyaasay 1.7 milyan oo qof oo Afghanistan u
dhashay labo bil ka hor.