Hadhwanaag
Hargaysa (HWN) Siyaasi Cali Guray ayaa kadigay in la dhayal sado ciidan
urursiga ay ku jirto Beesha Garxajis.
Cali ayaa intaasi ku daray in Maxamed Kaahin, Muuse Biixi iyo Gudoomiye
Saleebaan ay ahaayeen rag usoo joogay xilalna hayay wakhtigii dagaalkii 1994kii, tan maantuna usaan-saan eegtahay dagaalkii 94kii, sida uu ku sheegay siyaasigu
qoraalkan hoose oo uu baahiyay:-
‘’Waar Hooya Belaayo Madax La Qabtay Leedahaye Mijo La Qabto Ma Leh
Wixii kaleba waa saleelo hadii aynu ka badbaadno tii 1994kii oo la moodo
in saansaankeedi muuqdo. Muuse iyo Saleebaan waa wasiiradii ugu tunka waynaa
xiligaasi oo si fudud dalka dalka dagaal sokeeye uga qarxay muddo laba sanadood
ahna uga socday. Muse wuxu ahaa
Wasiirkii Arimaha Gudaha ee ugu awoodda badnaa, halka Saleebaanna uu ahaa
Wasiirka Maaliyadda. Maanta Muuse waa Madaxwayne Saleebaana waa Gudoomiyaha
Guurtida. Waa labadii xil ee ugu sareeyay qaranka Somaliland.
Sool waynu og nahay oo lixdii bilood ee ugu dambeeyay dagaal baa ka
socda. Anigu waan sheegay dagaal sokeeye oo dhexdeenna ah ayaan u arkaa. Waayo
dee Sool waa Somaliland, Dhulbahante waa Somaliland. Magaalada lagu dhex
dagaalamay ee Laascaanood waa Somaliland Khasaaraha dagaalka ee dhimasho iyo
dhaawac, burbur iyo barokac lihina cidda uu soo gaadhay waa Somaliland. Hadana
weli uma qudhqudhsana Muuse Biixi iyo xukuumadiisa. Ta hadda aynu og nahay ee
ciidan urursiga ah ee ka socota gobolada kale ee dalkana hadii la fudaydsado
maaha wax aan laga fakari karin in 29 sanadood ka dib tii 94kii mar kale
Somaliland ku soo noqon karto. Nasiib darro Muuse iyo Saleebaan iyagu sidaa uma
arkaan ee tooda ayaa u cad oo ay iska wataan.
Belaayo madax la qabto ayay leedahaye mijo la qabto ma leh ee bal aynu
eegno talaabooyinka ka hortagga ah ee Muuse Biixi uu qaado si uu dalka uga
badbaadiyo tu la mid ah 1994kii’’ ayuu Cali Guray ku yidhi qoraalkiisa.
Beesha Garxajis ayaa ku jirta todobaadyadii ugu dambeeyay ciidan urursi,
balse wali xukuumada Somaliland kamay hadal hawsha ciidan urursiga.
