hadhwanaag
Hargaysa (HWN)
Gudoomiyaha Xisbiga Waddani Xirsi Cali X. Xasan ayaa sheegay in dalku gelayo
doorashadii madaxtooyada, isagoo xusay in doorashadaasi miisaaniyadeedii iyo
sharciyadeediiba ay diyaar yihiihn.
Dhinaca kale waxa uu
gudoomiyuhu xusay qaabkii xisbiga waddani uga qayb qaatay kaadh qaybintii ka
dhacday dalka, sida uu gudoomiyuhu ku sheegay qoraalkan uu baahiyay.
"Marxaladdii ugu
muhiimsanayd ee geeddiga doorashada ayaa shalay oo ku beegnayd 21June inoo soo
gebagabowday, taas oo isugu jirtay diiwaangelinta codbixiyayaasha iyo qaybinta
kaadhadhka oo ka dambaysay, isugeyntoodana qaatay muddo 6 bilood ah. Runtii waa
tallaabo muhiim ah oo loo qaaday dhanka sanduuqa doorashada, bogaadintana waxaa
leh KDQ oo dedaal muuqda geliyey sidii hawshu halkan u soo gaadhi lahayd.
Xisbi ahaan, waxa aannu
qaadannay doorkii nagaga aaddanaa wacyigelinta diiwaangelinta iyo sidoo kale
kaadh-qaadashada, waxana aannu uga soo baxnay sidii ugu habboonayd, annaga iyo
taageerayaashayaduba. Taasina wax ay muujinaysa sida aannu Xisbi ahaan diyaarka
ugu nahay qabsoomidda doorashooyinka, gaar ahaanna doorashada Madaxtooyada oo
ah tan hadda wakhti ahaan, sharci ahaan iyo miisaaniyad ahaan ba diyaarka ah.
Waxaa xaqiiq ah in guud
ahaan shacbiga Somaliland, xisbiyada qaranka, beesha caalamka iyo KDQ ay ka soo
baxeen doorkoodii, xaajana waxay maraysaa "Loogow laguu fadhiyee"!
Ugu dambayn, waxa aannu
qabnaa in sida ugu dhakhsaha badan loo soo saaro jadwalkii doorasho, maadaama
hawshii ugu weyneyd ee diiwaangelintu soo gebagbowday, si awoodda umadda loogu
soo celiyo, loona xaqiijiyo himiladii ay naawilayeen oo loo nooleeyo rejeda
shacabka!" ayuu Gudoomiyaha Xisbiga
Waddani Xirsi kuyidhi qoraalka uu baahiyay.
