Kud ka Guur Oo Qanjo u Guur.
wuxuu aha mid ku dhisan aragtiyo maadiya iyo awaamiir aan la taaban karin.
Wuxuu ahaa geedi aan la garan karin goortuu degi
doono iyo goobtuu ku aadan yahay, kaasoon tilmaamo mooyee aan jiho la arki karo
inoo sheegi jirin.
Wuxuu ahaa geedi ruuxii ka hadha lagu dhaleecayn
jiray, kii dood ka keenana lagu dhangadayn jiray halka ka dheeligiisa sheegana
lagu dhantaali jiray.
Wuxuu ahaa geedi uu macallinku isku mariye ka
ahaa, taasoo micnaheedu tahay cida kaliya ee hadli karta, cashar dhigi karta
ama fikir soo jeedan karta aaraana gudbin kartaa waa uun macalinka.
Wuxuu ahaa geedi laga reebi jiray ruuxa danyarta
ah, kaasoo lagu dhaafi jiray lagagana tegi jiray bacaad iyo dhul gari go’an ah
kaasoon hanfi iyo olol mooyee aan oomato kale lahayn.
Iskuuladu waa dayayn
Damiinimaday
dhigaan
Dartay
uma soo lug go’in
Duruustu
falkay tiqiin
”Hadraawi”
Hadaba
qoomamada iyo is ciil kaambiga waayahaa naga tegay iyo tayo la’aanta duruusti
nala siin jiray anagoo la yaaban, ayaa waa alle mahadiiye nolol jaamacadeed iyo
darajo jaamici aanu gaadhnay.
Waxaanu qaadnay wado cusub iyo hilin hor leh,
waxaanu galnay anagoo faraxsan isla markaana ku taamaynay inaanu tacliintii
tayada lahayd iyo tii runta ahayd soo gaadhnay, haduunbaad toobiyaha saxda ah
lugta saarteen ayaanu kor ugu dhawaaqnay.
Judhiiba waxaanu badelnay qaab fikir kayaagii,
hanaankaanu u hadli jirnay ilaa iyo aanu ka gaadhnay inaanu badelno habkii
labisaada, waxaanu tunka saaranay laabtooyo iyo aalado naga culus isla markaana
waxaanu qaadanay bugaag ka waaweyn kuwii hore.
Markaanu sugayno gaadiidka jaamacada waanu la yaabna
yaryarka dirayska xidhan ee ay basasku laba dhigayaan, waxaanan hoos u
dhahnaa ”walee lug go’ iyo hadal uun
baad soo taradhsanaysaan” balse maanu moodayn inay maqaaxiyaha wadada kusoo
jeeda kuwo iyagu jaamacadaha kasoo baxay ay fadhiyaan kuwaasoo iyaguna hoos wax
noo leh.
Wuxuunbaanu layaabanayn marka ay ardaydeena
jaamacada qalinjabinaysaa inta ay gaawaadhi sawiraantooda kusoo dhajiyaan ay
sidii musharax gole deegaan hadba daan tagayaan iyagoo isku socodka wadada iyo
gaadiidkaba xidhaya.
Halka dhigooda caalamka kula noolina ay markay
qalin jabinayaan ikhtiraacyo cusub iyo farsamo hor leh oo bulshada anfacaysa
kusoo kordhinayaan isla markaana kuwo kamidi qorayaan buugaag caalamka oo dhan
laga akhristo.
Hadaba bulshooy hadii aad ka dharagsan tihiin
wajiyada saxda ah iyo nolosha dugsiyadeena waa sidee nolosha jaamacadu ? Maxaa
ma dhalays ka dhigay ardaydeena kumanaanka dufkacadood ee jaamacdaha kala duwan
ee dalka kasoo baxaya ? mase is waydiiseen halkaynu usoconaa halkeebaynu se ka
soconaa ? waa weydiimo idinku maqan loona baahan yahay war celin tooda.
Bal aynu dhowrno maqaalka kan xiga iyo Deegaanka
aqoonta iyo duruufaha.
Mahadsanidin dhamantiin.
Qalinkii : C.casiis Maxamed Meegaar
Email: [email protected]
No: 252634859724
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!