Cudurka Ku Dhaca Haweenka Ee Sababa In Aysan Yeelan Ilmo-galeen
Kesia Nascimento markii
ay jirtay 13 waxay aheyd gabar buuran marka loo eego hablaha da'deeda ah. Hadda
waa 19 jir, waxay sheegtay in uusan weli ku dhicin dhiigga caadada.
"Hooyadey markii
ay yareyd waxaa ka daahay in uu ku dhaco dhiigga caadada, waxaan u maleynayay
xaalad iska caadi ah, markaas waxaan go'aansaday in aan sugo wakhti dheer"
ayay tiri gabadhan da'da yar.
Waxay la talin
caafimaad ka heshay dhaqaatiirta, lagumana arkin wax astaan ah ama dhibaato
caafimaad, markii ay gaartay 16 jir , dhaqtaraddii qaabbilsaneyd cudurrada
haweenka ayaa ku amartay inay sameyso baaritaan caafimaadka.
Sanad kaddib markii ay
17 jir aheyd, Kesia Nascimento waxaa laga baaray dhiigga, waxaana la saaray
qalab lagu eegay xaaladdeeda caafimaad, iyadoo loo sameeyay baaritaanno kale oo
dhanka cudurrada haweenka ah.
"Dhaqtarka wuxuu
la yaabay xaaladdeyda xilligaas. Wuxuu i tusay sawirro muujinaya in aanan
laheyn ilmo-galeenka iyo marinka xubinta taranka," ayay tiri Kesia
Nascimento.
Dhaqaatiirtu waxay
Nascimento u sheegeen inay marto baaritaan kale oo caafimaad. Waxay u
maleynayeen in uu wax ka qaldan yahay ilmo-galeenka, markii raajada la saaray
waxaa la ogaaday inay la daalaa-dhaceyso xaalad caafimaad oo naadir ah.
Markii
laga helay cudurka
Markii la baaray, isla
markaana la siiyay la talin caafimaad, nolosha Nascimento way isbeddeshay.
Dhaqaatiirta waxay u sheegeen in gabadhan da'da yar uu ku dhacay cudur la
yiraahdo Rokitansky syndrome, kaasoo sababa in dumarku ay dhashaan iyagoo aan
laheyn ilmo-galeen iyo marinka xubinta taranka.
"Markii ay
dhaqaatiirtu ii sheegtay xaaladdeyda caafimaad. Waan isku naxay, waa wax aadan
filaneyn. Hooyadey ayaan dhageysanayay markii ay dhaqtaraddu yara aamustay,
waxaan ku dhex ooyay musqusha, illinta ayaan iska tiray, waana soo
laabtay," ayay tiri Nascimento.
Markii ay guriga kusoo
laabatay waxay sheegtay inay ka waalacday xaaladdeedda caafimaad. Waxay u
maleysay inay meesha ka baxday riyadii aheyd inay hooyo noqoto.
Muxuu
yahay cudurka Rokitansky ?
Waa xaalad
caafimad-darro ah oo uu ku dhasho qofka, taas oo horseedda maqnaashaha
ilmo-galeenka ama in aanay dhamaystirnayn qeyb ka mid ah marinka xubinta
taranka ee haweenka.
"Cudurka wuxuu ka
dhashaa isbeddel ku yimaada qaabka uu u sameysmo jirka inta uusan qofka dhalan.
Wuxuu beddelaa qaabka xubinta taranka, laakiin dumarku waxay leeyihiin ugxaan-sidaha
iyo horumarinta dabeecadaha galmada.
Gabdhaha waxay
waydiisanayaan caawimaad, sababtoo ah iskuma aanay arag dhiigga caadada,"
ayuu yiri Natália Piovani, oo ah dhaqtar ku takhasusay cudurrada haweenka, isla
markaana macallin ka ah jaamacadda Positivo, ee ku taalla Curitiba ee dalka
Brazil.
Maqnaashaha caadada
waxaa sababa in ilmo-galeenka aysan kasoo bixin xuub ama unugyo ku gadaaman
ilmo-galeenka. Haweenku wuxuu dhiigga caadada ku dhacaa marka ay gaaraan da'da
9 iyo 13 jir.
Cudurkan waxaa loo
qaybin karaa saddex nooc. Nooca koowaad ayaa ah kan ugu caansan, wuxuuna
saameyn karaa qiyaastii 70% haweenka. Xanuunkan wuxuu isbeddel kooban ku keena
habka taranka.
Nooca labaad, ee loo
yaqaanno nooca caadiga ah iyo nooca aan caadiga ahayn ee horseeda xaaladda
caafimaad-darrada ah, waxay la xiriirtaa cudurrada ku dhaca ugxan-sidaha, kuwa
kelyaha ku dhaca ee ay ilmuhu ku dhashaan, lafaha iyo cudurrada dhegaha.
Nooca saddexaad waa
midka ugu daran ee naadirka ah, wuxuu horseedaa cudurro kale.
Dhaqaatiirtu cudurkan
kuma tilmaamaan mid naadir ah maaddaama uu saameeyo 5,000 oo haween ah, wuxuuna
dumarka u horseedaa in aysan helin dhiigga caadada, dumarka qaar haddii uu ku
dhaco waxay dareemaan xanuun marka ay galmadu timaaddo.
Dhaqtarad Claudia
Melotti waxay go'aansatay inay aasaasto machadka Roki oo ah goobta ugu weyn ee
la talinta dhanka daweynta ah siisa bukaannada uu ku dhacay cudurkan, inkastoo
Claudia Melotti ay la daalaa-dhaceyso xanuunkan oo ay isku aragtay markii ay 13
sano jir aheyd, mana laha wax ilmo galeen ah. Wax dawo ah ma aysan helin tan
iyo markii ay gaartay lix jir.
Cudurkan
ma leeyahay dawo?
Cudurka Rokitansky
waxaa lagu daweyn karaa dawooyin kala duwan iyo layliyo ay dhaqaatiirtu ku
taliyaan.
Dhaqanka ugu badan waa
in la sameeyo qalliin gaar ah si loo dheereeyo marinka xubinta taranka haweenka
ilaa laga helo cabbirka ugu habboon ee marinka xubinta.
"Bukaanka uu ku
dhacay cudurkan waxaa ku adag galmada, waxaa lagu sameeya qaabka qalliinka ah
ee gaarka ah si loo furo marinka xubinta taranka," ayay tiri Priscila
Medina, oo ku takhasustay cudurrada haweenka, kana howlgasha isbitaalka
Beneficência Portuguesa ee dalka Brazil.
Dumarka uu ku dhacay
cudurkan waxaa habboon inay la tashadaan dhaqatiirta ku takhasustay cudurrada
haweenka iyo kuwa bartay cilmu-nafsiga.
Marka lagu guuleysan
waayo qalliinka gaarka ah, waxaa la adeegsadaa habab kale oo lagu daweynayo
dumarka uu ku dhacay xanuunka. Balse, waxaa dumarka loo sameyn karaa marin
cusub oo xubinta taranka ah. Qofka bukaanka ah waxaa la daweynayaa afar ilaa
shan maalmood.
Waxaa sidoo kale
dumarka uu ku dhacay xanuunkan lagula taliyaa inay la xiriiraan dumarka qaba
cudurka si ay u yeeshaan kulamo ay isku taageerayaan, isla markaana ay
xaaladdooda kula soconayaan.
BBC